శంకరన్న గాంధీగిరికి టీవీ చానెళ్ల హంగామా

By Pratap

Published: Saturday, December 24, 2011, 9:55 [IST]

ముఖ్యమంత్రి కిరణ్ కుమార్ రెడ్డికి వ్యతిరేకంగా గాంధీగిరికి దిగిన మంత్రి పి. శంకరరావు విధుల నిర్వహణ కన్నా టీవీ చానెళ్ల ప్రత్యక్ష ప్రసారాలకే ఎక్కువ ప్రాధాన్యం ఇచ్చారనే మాట వినిపిస్తోంది. ఫర్నీచర్ లేదనే కారణంతో శంకరరావు సచివాలయంలోని తన కార్యాలయంలో కింద కూర్చుని విధులు నిర్వహించారు. అధికారులతో సమీక్ష నిర్వహించారు. ఫోటోగ్రాఫర్లకు పోజులు ఇస్తూ, టీవీ చానెళ్ల ప్రతినిధులతో మాట్లాడుతూ ఆయన కనిపించారు. నిరుడు నవంబర్‌లో సచివాలయంలోని ఎల్ బ్లాకులో శంకరరావు కార్యాలయానికి సాధారణ పరిపాలనా శాఖ (జిఎడి) 3 లక్షల రూపాయల విలువ చేసే కొత్త ఫర్నీచర్‌ను అందించింది.

ఆ తర్వాత ఆయన కార్యాలయం హెచ్ బ్లాక్‌కు మారింది. ఇక్కడికి మారిన తర్వాత మళ్లీ శంకరరావు కొత్త ఫర్నీచర్ అడిగారు. అయితే, దానికి నిధుల విడుదలకు ముఖ్యమంత్రి క్లియరెన్స్ ఇవ్వలేదు. దీంతో తన పట్ల ముఖ్యమంత్రి వివక్ష ప్రదర్శిస్తున్నారని శంకరరావు బయటి ప్రపంచానికి చాటదలుచుకున్నారని అంటున్నారు. అందువల్లే టీవీ చానెళ్ల కవరేజీకి ఆయన ఎక్కువ ప్రాధాన్యం ఇచ్చారని అంటున్నారు. ఏమైనా, శంకరన్న రూటే వేరని అందరికీ తెలిసిన విషయమే.

Published On December 24, 2011