తెలంగాణ, సమైక్య కార్యక్రమాలకు చెక్?

హైదరాబాదులో తెలంగాణ, సమైక్య దీక్షలు తదితర భారీ కార్యక్రమాలకు రాష్ట్ర ప్రభుత్వం ఇక నుండి నో చెప్పనుందా? అంటే అవుననే అభిప్రాయపడుతున్నారు పలువురు. తెలంగాణ రాజకీయ ఐక్య కార్యాచరణ సమితి ఆధ్వర్యంలో నవంబరు 1నుండి ప్రారంభయ్యే ప్రజాప్రతినిధుల దీక్షకు ఇందిరాపార్కు వద్ద అనుమతి లభించలేదు. ఇందిరాపార్కు పక్కనున్న ఎన్టీఆర్ స్టేడియంలో రాష్ట్ర అవతరణ దినోత్సవం ఉందన్న కారణంతో అనుమతి నిరాకరించినట్లుగా తెలుస్తోంది. అయితే అక్కడే కాదు న్యూఎమ్మెల్యే క్వార్టర్సులోనూ దీక్ష చేపట్టడానికి అనుమతి లభించలేదు. గతంలోనూ మాజీ ప్రజారాజ్యం పార్టీ నేత పరకాల ప్రభాకర్ ఆధ్వర్యంలో జరిగిన విశాలాంధ్ర మహా సభ కార్యక్రమానికి కూడా పోలీసులు అనుమతులు నిరాకరించారు.

రాజధానిలో తెలంగాణ, సమైక్య రాష్ట్రాలకు మద్దతుగా చేసే భారీ కార్యక్రమాలు నిత్యం వివాదాస్పదం అవుతుండటంతో అనుమతులే నిరాకరించడం మంచిదన్న అభిప్రాయానికి వచ్చినట్లుగా తెలుస్తోంది. ఇప్పటికే విశాలాంధ్ర మహా సభ నిర్వహించే ఏ భారీ కార్యక్రమానికి కూడా భవిష్యత్తులో హైదరాబాదులో అనుమతులు లభించవనే వార్తలు వచ్చాయి. ఇప్పుడు తెలంగాణ జెఏసి దీక్షలకు అనుమతులు నిరాకరించడంతో ఇకనుండి తెలంగాణవాదులు చేపట్టే దీక్షలు తదితర భారీ కార్యక్రమాలకు కూడా లభించక పోవచ్చుననే అభిప్రాయాలు వెలువడుతున్నాయి. అయితే ఎమ్మెల్యేల దీక్షలకు శాంతిభద్రతల దృష్ట్యానే అనుమతించలేదని సమాచారం.

English summary

It seems, state government is thinking to put check telangana and seemandhra agitations in Hyderabad.