కిరణ్ కుమార్ రెడ్డికి జెసి పొగ?

By Pratap

Published: Tuesday, June 21, 2011, 9:33 [IST]

మంత్రి పదవి దక్కకపోవడంతో తీవ్ర అసంతృప్తితో రగిలిపోతున్న కాంగ్రెసు సీనియర్ శానససభ్యుడు జెసి దివాకర రెడ్డి ముఖ్యమంత్రి కిరణ్ కుమార్ రెడ్డికి పొగ పెడుతున్నారా అనే అనుమానాలు వ్యక్తమవుతున్నాయి. శత్రువు శత్రువు మిత్రుడనే సూత్రాన్ని జెసి అనుసరిస్తున్నట్లు అర్థమవుతోంది. కిరణ్ కుమార్ రెడ్డిపై తీవ్ర వ్యాఖ్యలు చేసిన చిత్తూరు జిల్లాకు చెందిన శాసనసభ్యుడు పెద్దిరెడ్డి రామచంద్రా రెడ్డితో జెసి దివాకర్ రెడ్డి సమావేశమయ్యారు. కిరణ్ కుమార్ రెడ్డిని ముఖ్యమంత్రి పదవి నుంచి దించడమే ధ్యేయంగా పని చేస్తానని పెద్దిరెడ్డి రామచంద్రా రెడ్డి ప్రకటించిన విషయం అందరికీ తెలిసిందే.

ముఖ్యమంత్రికి వ్యతిరేకంగా ఉన్న శాసనసభ్యులను జెసి కూడగట్టే పనిలో పడ్డారా అనే అనుమానాలు కూడా వ్యక్తమవుతున్నాయి. ముఖ్యమంత్రిపై రగిలిపోతున్న శాసనసభ్యులు చాలా మందే ఉన్నారు. మంత్రివర్గ పునర్వ్యస్థీకరణ జరిగితే వారి సంఖ్య మరింత పెరుగుతుంది. అందువల్ల ఇప్పటి నుంచే కిరణ్ కుమార్ రెడ్డికి ఎసరు పెట్టేందుకు జెసి సమాయత్తమవుతున్నారని వినికిడి.

Published On June 21, 2011