తెలంగాణ తల్లి కెసిఆర్ కూతురి రూపమా?

By Pratap

Published: Monday, November 7, 2011, 16:27 [IST]

తెలంగాణ రాష్ట్ర సమితి (తెరాస) అధ్యక్షుడు కె. చందజ్రశేఖర రావుపై అలుపెరుగని పోరాటం చేస్తున్న ఎమ్మార్పీయస్ నేత మందకృష్ణ మాదిగ కొత్త వాదనకు తెర లేపారు. మాటలకే కాదు, ఐడియాలకు ఆయన పదును పెడుతున్నారు. ఆయన ఇప్పుడు తెలంగాణ తల్లి విగ్రహాన్ని ఆసరా చేసుకుని కెసిఆర్ కూతురు, తెలంగాణ జాగృతి అధ్యక్షురాలు కల్వకుంట్ల కవితను టార్గెట్ చేసుకున్నారు. తెలంగాణ తల్లి కల్వకుంట్ల కవిత రూపమని ఆయన ఓ కొత్త విషయం కనిపెట్టి మరీ చెప్పారు. తెలంగాణ తల్లి ఒక బొమ్మ మాత్రమేనని ఆయన ఆదిలాబాద్ జిల్లా శ్రీరాంపూర్‌లో ఆదివారం వ్యాఖ్యానించారు.

ఇన్నాళ్లు దొరలకు బాంచన్ అని, ఇప్పుడు దొరసానులకు కూడా బాంచన్ అనే విధంగా తెలంగాణ తల్లి రూపొందించారని ఆయన విరుచుకుపడ్డారు. అసలైన తెలంగాణ తల్లి చాకలి ఐలమ్మ అని ఆయన అన్నారు. తాము ఐలమ్మనే తల్లిగా కొలుస్తామని చెప్పారు. ఏమైనా, మందకృష్ణ మాదిగ బుద్ధి పదునుకు జేజేలు కొట్టాల్సిందే.

Published On November 7, 2011