బాబును వెనకేసుకొచ్చిన జగన్ 'సాక్షి'

By Pratap

Published: Saturday, July 30, 2011, 10:04 [IST]

తెలుగుదేశం పార్టీ అధ్యక్షుడు నారా చంద్రబాబు నాయుడి మీద వైయస్సార్ కాంగ్రెసు పార్టీ అధ్యక్షుడు వైయస్ జగన్‌ ఒంటి కాలి మీద లేస్తారు. కానీ, ఆయనకు చెందిన సాక్షి దినపత్రిక చంద్రబాబును వెనకొసుకొచ్చింది. అయితే జగన్‌కు అకస్మాత్తుగా ఈ చంద్రబాబుకు ప్రేమ అంకురించడం వెనక మరో కారణం ఉంది. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును తప్పు పట్టేందుకు చంద్రబాబును సాక్షి దినపత్రిక వెనకేసుకొచ్చిందనేది తెలుస్తూనే ఉన్నది. కెసిఆర్ పేరు ప్రస్తావించకుండా గుసగుస శీర్షిక కింద దూరాలోచన అంటూ ఆ ఊహాగానాన్ని సాక్షి శనివారం ప్రచురించింది.

తెలంగాణ రాష్ట్రం ఏర్పాటుపై నోరెత్తకున్నా కాంగ్రెసు పార్టీ అధ్యక్షురాలు సోనియా గాంధీని కెసిఆర్ పల్లెత్తు మాట అనడం లేదని చెప్పడానికి చంద్రబాబును సాక్షి వెనకేసుకొచ్చింది. రాష్ట్రం ఇచ్చేందుకు, అడ్డుకునేందుకూ ఏ శక్తీ లేని టిడిపి, రాష్ట్ర కాంగ్రెసు నేతలపై మాత్రం ఒంటి కాలి మీద లేవడం కెసిఆర్‌కు అలవాటైందని ఆడిపోసుకుంది. ఇందులో కొసమెరుపు ఏమిటంటే, తెలంగాణపై గోడ మీది పిల్లి వాటం తీసుకున్న వైయస్ జగన్‌ను ఏమీ అనకూడదనే సందేశంలాంటి సూచన ఉందని భావిస్తున్నారు.

Published On July 30, 2011