చెంప చెళ్లుమనిపించిన ఎమ్మెల్యే

By Srinivas

Published: Sunday, November 6, 2011, 10:12 [IST]

సంగారెడ్డి శాసనసభ్యుడు తూర్పు జయ ప్రకాశ్ రెడ్డి(జగ్గా రెడ్డి) శనివారం ఓ యువకుడి చెంప చెల్లుమనిపించారట. విషయానికొస్తే సదాశివపేట ప్రాంతంలోని రచ్చబండ కార్యక్రమంలో జగ్గారెడ్డి పాల్గొన్నారు. ఆ సమయంలో ఓ వ్యక్తి అక్కడకు వచ్చి రూపాయికి కిలో బియ్యం పథకంలో ఇస్తున్న బియ్యం బాగా లేవని తన వెంట తీసుకు వచ్చిన మూటాను ఎమ్మెల్యే ఎదురుగా ఉన్న బల్లపైన పెట్టాడు. ఇవి తింటే రోగాలు వస్తాయంటూ నిలదీశాడు. జగ్గారెడ్డి అక్కడే ఉన్న మహిళలను, విలేకరులను పిలిచి బియ్యాన్ని చూపించాడు. బియ్యం చూసిన మహిళలు బాగానే ఉన్నాయి కదా అని చెప్పారు.

దీంతో ఆగ్రహం వ్యక్తం చేసిన జగ్గారెడ్డి వెంటనే సదరు వ్యక్తి చెంప చెల్లుమనిపించాడు. మెడ పట్టుకొని తోసేస్తూ ఇతనిని బయటకు పంపించండంటూ పోలీసులకు అప్పగించాడు. అయితే బియ్యం ఎలా ఉన్నాయనే విషయాన్ని పక్కన పెడితే సాధారణ పౌరుడిగా తన సమస్యను చెప్పుకొన్నందుకే వెళితే ఇలా కొట్టడంతో సదరు వ్యక్తి నిర్ఘాంత పోయాడట.

Published On November 6, 2011