నాగం జనార్దన్ రెడ్డి వెనక జైపాల్ రెడ్డి?

By Pratap

Published: Monday, March 7, 2011, 14:39 [IST]

తెలంగాణ విషయంలో పార్టీ అధ్యక్షుడు నారా చంద్రబాబు నాయుడి మాటను తెలుగుదేశం పార్టీ తెలంగాణ ప్రాంత శానసభ్యుడు నాగం జనార్దన్ రెడ్డి వెనక కేంద్ర మంత్రి ఎస్ జైపాల్ రెడ్డి ఉన్నారా అనే అనుమానాలు కలుగుతున్నాయి. ఈ అనుమానాలను రేకెత్తించడానికి చంద్రబాబు వెంట ఉన్న తెలంగాణ ప్రాంత తెలుగుదేశం శాసనసభ్యులు తీవ్రంగా కృషి చేస్తున్నారు. జైపాల్ రెడ్డితో పాటు నాగం జనార్దన్ రెడ్డి కూడా మహబూబ్‌నగర్ జిల్లాకు చెందినవారే కావడం గమనార్హం. జైపాల్ రెడ్డితో నాగం జనార్దన్ రెడ్డి టచ్‌లో ఉన్నారని అదే జిల్లాకు చెందిన తెలుగుదేశం పార్టీ శాసనసభ్యుడు రేవంత్ రెడ్డి వ్యాఖ్యానించారు. పార్టీలో తెలంగాణ స్వరాన్ని పెంచడంతో నాగం జనార్దన్ రెడ్డికి వ్యతిరేకంగా రేవంత్ రెడ్డిని, మోత్కుపల్లి నర్సింహులును చంద్రబాబు ప్రోత్సహిస్తూ వస్తున్నారు.

ఇప్పుడు నాగం జనార్దన్ రెడ్డి వెంట తమ పార్టీకి చెందిన తెలంగాణ ప్రాంత శాసనసభ్యులు ఎవరూ లేరని చెప్పేందుకు చంద్రబాబు ప్రయత్నిస్తున్నారు. అయితే, పోచారం శ్రీనివాస రెడ్డి ఇప్పటికే పార్టీ నుంచి తప్పుకోవాలని నిర్ణయించుకున్నారు. మరికొంత మంది కూడా చంద్రబాబుపై తీవ్ర అసంతృప్తితో ఉన్నారు. అదలా ఉంచితే, నాగం జనార్దన్ రెడ్డి కాంగ్రెసు వర్కింగ్ కమిటీలోని ఓ సభ్యుడితో సన్నిహితంగా ఉంటున్నారని రేవంత్ రెడ్డి వ్యాఖ్యానించారు. ఆ విధమైన వ్యాఖ్యల ద్వారా నాగం జనార్దన్ రెడ్డి కాంగ్రెసుకు దగ్గరవుతున్నారని అనిపించదడానికి చంద్రబాబు ప్రయత్నిస్తున్నట్లు అర్థం చేసుకోవచ్చు.

Published On March 7, 2011