బాబుకు షాకిచ్చిన జూ ఎన్టీఆర్

By Pratap

Published: Thursday, April 7, 2011, 8:39 [IST]

తన మామయ్య, తెలుగుదేశం పార్టీ అధ్యక్షుడు నారా చంద్రబాబు నాయుడికి సినీ హీరో జూనియర్ ఎన్టీఆర్ షాకిచ్చినట్లు ప్రచారం జరుగుతోంది. కృష్ణా జిల్లా తెలుగుదేశం పార్టీలో రచ్చకెక్కిన విభేదాలపై సింగపూర్‌లో ఉన్న చంద్రబాబు ఫోన్ చేస్తే జూనియర్ ఎన్టీఆర్ కనీసం ఫోన్ కూడా ఎత్తలేదని చెబుతున్నారు. కృష్ణా జిల్లా టిడిపి అధ్యక్షుడు దేవినేని ఉమా మహేశ్వర రావుపై తిరుగుబాటు ప్రకటించిన వల్లభనేని వంశీ, కొడాలి నాని జూనియర్ ఎన్టీఆర్‌కు సన్నిహితులు. వంశీ ఉమా మహేశ్వర రావుపై బహిరంగంగా విరుచుకుపడినప్పుడు చంద్రబాబు సింగపూర్ పర్యటనలో ఉన్నారు. ఆ సమయంలో విషయం తెలుసుకుని, వంశీకి నచ్చజెప్పాలని సూచించేందుకు జూనియర్ ఎన్టీఆర్‌కు చంద్రబాబు సింగపూర్ నుంచి ఫోన్ చేసినట్లు చెబుతున్నారు.

జూనియర్ ఎన్టీఆర్ తనతో మాట్లాడడానికి ఇష్టపడకపోవడంపై చంద్రబాబు తీవ్ర మనస్తాపానికి గురైనట్లు వార్తలు వస్తున్నాయి. నందమూరి కుటుంబానికి జూనియర్ ఎన్టీఆర్‌ను దగ్గర చేసింది తానే అని, బాలకృష్ణతో జూనియర్ ఎన్టీఆర్‌కు మాటలు కల్పించింది కూడా తానే అని, అంతగా తాను సహకరించిన తనను జూనియర్ ఎన్టీఆర్ లెక్కచేయడం లేదని చంద్రబాబు బాధపడుతున్నట్లు చెబుతున్నారు. మామ స్వర్గీయ ఎన్టీఆర్‌పై తిరుగుబాటు చేసిన చంద్రబాబుకు మీరు నేర్పిన విద్యయే, మహానుభావా అనే రీతిలో జూనియర్ ఎన్టీఆర్ సమాధానం ఇచ్చినా ఆశ్చర్యం లేదని అంటున్నారు.

Published On April 7, 2011