కొరుకుడు పడని కెసిఆర్

By Pratap

Published: Friday, July 29, 2011, 9:01 [IST]

కాంగ్రెసు, తెలుగుదేశం పార్టీలకు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కొరుకుడు పడడం లేదు. కెసిఆర్‌ను అధిగమించి తెలంగాణ ఛాంపియన్లమై పార్టీని కాపాడుకోవాలనే తెలుగుదేశం పార్టీ అధ్యక్షుడు నారా చంద్రబాబు నాయుడు వ్యూహాలు పని చేయడం లేదు. రాజీనామాలు చేసిన వెంటనే బస్సు యాత్ర చేపట్టిన తెలుగుదేశం తెలంగాణ నేతలకు బండి మీడ నల్లేరు నడక ఏమీ కాలేదు. పైగా, ఎదురు దెబ్బలు కూడా తగిలాయి. తెలుగుదేశం నాయకులు ఎంతగా కెసిఆర్‌ను తిడుతుంటే అంతగా ఆయనకు దీవెనలుగా మారుతున్నట్లు కనిపిస్తోంది.

కాగా, కెసిఆర్‌ను వెనక్కి నెట్టేయాలనే కాంగ్రెసు తెలంగాణ ప్రాంత కాంగ్రెసు నాయకుల పప్పులు కూడా ఉడకడం లేదు. రాజీనామాలు చేసి, తెలంగాణ ఉద్యమానికి నాయకత్వం వహించాలని భావించిన వారికి పార్టీ అధిష్టానం పెద్ద అడ్డంకిగా మారింది. తమ సొంత పార్టీకి చెందిన సీమాంధ్ర నాయకులపై కాంగ్రెసు తెలంగాణ నేతలు కెసిఆర్ కన్నా తీవ్ర స్థాయిలో తిట్టిపోసినా ఫలితం అంతంత మాత్రంగానే కనిపిస్తోంది. ఎటు చూసినా కెసిఆర్ క్రెడిట్ కొట్టేసే అవకాశాలే ఎక్కువగా ఉన్నాయి. కేవలం తెలంగాణ రాష్ట్ర ఏర్పాటు కోసమే పనిచేస్తుండడం వల్ల ఆయనకు ఆ అవకాశం చిక్కినట్లుంది.

Published On July 29, 2011