కెసిఆర్ ఢిల్లీ యాత్ర రద్దు వెనక..

By Pratap

Published: Tuesday, October 11, 2011, 8:29 [IST]

తెలంగాణ సకల జనుల సమ్మె ప్రారంభమైన తర్వాత రెండోసారి ఢిల్లీకి వెళ్లి కాంగ్రెసు అధిష్టానం పెద్దల మనసు కరిగించాలని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అనుకున్నారు. ఆయన మంగళవారం ఢిల్లీకి వెళ్లి కేంద్ర మంత్రులు ప్రణబ్ ముఖర్జీ, ఎకె ఆంటోనీలను కలవాల్సి ఉంది. అయితే, అకస్మాత్తుగా ఆయన ఢిల్లీ పర్యటనను రద్దు చేసుకున్నారు. ముఖ్యమంత్రి కిరణ్ కుమార్ రెడ్డి చేసిన హెచ్చరికలు, ఆర్టీసి కార్మిక సంఘం ఎన్ఎంయు వ్యవహారం కెసిఆర్ మనసు మార్చినట్లు చెబుతున్నారు.

తెలంగాణ జెఎసి చైర్మన్ కోదండరామ్‌ను నిష్కారణంగా అరెస్టు చేయడం కూడా కెసిఆర్ మనసును బాధపెట్టిందని అంటున్నారు. బయటకు కారణాలు ఏం చెబుతున్నప్పటికీ లోలోపల వ్యవహారం మరో రకంగా ఉందని అంటున్నారు. ఢిల్లీకి వెళ్తే తెలంగాణ ప్రజల్లోకి తప్పుడు సంకేతాలు వెళ్లే ప్రమాదం ఉంది. ఇటీవలి కెసిఆర్ ఢిల్లీ పర్యటన మీదనే విమర్శలు వచ్చాయి. ప్రభుత్వం సమ్మెపై ఉక్కుపాదం మోపబోతున్నట్లు సంకేతాలు అందుతున్న నేపథ్యంలో తాను ఢిల్లీ వెళ్తే తనకు వ్యతిరేకంగా జరిగే పరిణామాలను ఊహించుకుని కెసిఆర్ ఢిల్లీ పర్యటనను రద్దు చేసుకున్నట్లు చెబుతున్నారు.

Published On October 11, 2011