బూరెల బుట్టలో పడనున్న జయసుధ?

By Pratap

Published: Tuesday, December 27, 2011, 13:07 [IST]

వైయస్సార్ కాంగ్రెసు పార్టీ అధ్యక్షుడు వైయస్ జగన్‌ను దూరం చేసుకుని ముఖ్యమంత్రి కిరణ్ కుమార్ రెడ్డి వైపు ప్లేటు ఫిరాయించిన సికింద్రాబాద్ శాసనసభ్యురాలు జయసుధ బూరెల బుట్టలో పడనున్నారు. ఆమెను పదవి వరించే అవకాశాలున్నట్లు ప్రచారం జరుగుతోంది. అవిశ్వాస తీర్మానం సందర్భంగా ప్రభుత్వానికి బాసటగా నిలువడమే కాకుండా, మొత్తంగానే కాంగ్రెసు వైపు మళ్లారు. ఇందుకు గాను ఆమెకు తగిన బహుమతి ఇవ్వడానికి కిరణ్ కుమార్ రెడ్డి నిర్ణయించుకున్నట్లు చెబుతున్నారు. ఆమెను మహిళా కమిషన్ చైర్‌పర్సన్‌గా నియమించే అవకాశాలున్నట్లు చెబుతున్నారు. ఈ మేరకు ఆమెకు ముఖ్యమంత్రి హామీ ఇచ్చారట.

కాగా, వైయస్ రాజశేఖర రెడ్డి ప్రోత్సాహంతో జయసుధ ఎన్నికల గోదాలోకి దిగి, సికింద్రాబాద్ నుంచి శాసనసభకు ఎన్నికయ్యారు. వైయస్ మరణం తర్వాత జగన్‌కు మద్దతుగా నిలుస్తూ వచ్చారు. వైయస్ మరణం తర్వాత ఆమె రాజకీయాలపై వైరాగ్యం ప్రదర్శించిన సందర్భాలు కూడా ఉన్నాయి. అయితే, ఈ కాలంలోనే ఆమె రాజకీయానుభవం గడించి, వైయస్ జగన్ నుంచి కిరణ్ వైపు ప్లేటు ఫిరాయించడానికి ఏ మాత్రం తొణకలేదని అంటున్నారు.

Published On December 27, 2011