వైయస్ జగన్‌ను బోల్తా కొట్టించిన కోమటిరెడ్డి?

By Pratap

Published: Thursday, December 8, 2011, 10:13 [IST]

అవిశ్వా తీర్మానం విషయంలో మాజీ మంత్రి కోమటిరెడ్డి వెంకటరెడ్డి వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిని బోల్తా కొట్టించారని ప్రచారం జరుగుతోంది. ముఖ్యమంత్రి కిరణ్ కుమార్ రెడ్డిపై ఇంతకు కారాలు మిరియాలు నూరిన ఆయన అకస్మాత్తుగా ఎందుకు విధేయుడై పోయారనే విషయంపై ఆసక్తికరమైన చర్చ జరుగుతోంది. ముఖ్యమంత్రిపై ఉన్న కోపావేశాలతో కోమటిరెడ్డి అవిశ్వాసానికి అనుకూలంగా ఓటేస్తారని అందరూ భావించారు. కానీ ఆయన అందరినీ ముక్కున వేలేసుకునేలా ప్రవర్తించారు. పైగా, జగన్ వైపు నలుగురు శాసనసభ్యులను పంపిస్తానని చెప్పారట కూడా. తాను అవిశ్వాసానికి అనుకూలంగా ఓటేయడంతో పాటు మరో నలుగురు ఎమ్మెల్యేలను అందుకు సిద్ధం చేశానని చెప్పి కోమటిరెడ్డి జగన్‌ను బోల్తా కొట్టించారని గుసగుసలు వినిపిస్తున్నాయి.

మరో విషయం కూడా ప్రచారంలో ఉంది. తాను ప్రభుత్వానికి వ్యతిరేకంగా ఓటేస్తానని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు కూడా చెప్పారని అంటున్నారు. కెసిఆర్ దాదాపు నాలుగు గంటల పాటు కోమటిరెడ్డి వెంకటరెడ్డితో మాట్లాడారట. కానీ, ఆయన కెసిఆర్ మాట వినడానికి సిద్ధంగా లేరని తెలుస్తోంది. మిడ్ మానేరు ప్రాజెక్టు పనుల కాంట్రాక్టుకు, కోమటిరెడ్డి వెంకటరెడ్డి వ్యవహారానికి సంబంధాన్ని పెట్టి ఆడిపోసుకుంటున్నారు.

Published On December 8, 2011