జగన్‌పై కొండా సురేఖ అసంతృప్తి?

By Pratap

Published: Monday, July 4, 2011, 8:41 [IST]

వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిపై కాంగ్రెసు తిరుగుబాటు శాసనసభ్యురాలు కొండా సురేఖ తీవ్ర అసంతృప్తితో ఉన్నట్లు వార్తలు వస్తున్నాయి. తెలంగాణ విషయంలో వైయస్ జగన్ వైఖరి, పార్టీలో తెలంగాణ నాయకులకు ప్రాధాన్యతాలేమి అందుకు కారణమని వినికిడి. వైయస్సార్ కాంగ్రెసు పార్టీలో సీమాంధ్ర నేతలదే పైచేయిగా ఉందనే విమర్శలు వినిపిస్తున్నాయి. గట్టు రామచంద్రరావును కేవలం మీడియా సమావేశాలకే ప్రాధాన్యం చేయడాన్ని వారు అందుకు ఉదాహరణగా తీసుకుంటున్నారు.

తెలంగాణపై వైయస్ జగన్ తెలుగుదేశం పార్టీ అధ్యక్షుడు నారా చంద్రబాబు నాయుడి రెండు కళ్ల సిద్ధాంతాన్నే స్వీకరించే అవకాశం ఉందనే అనుమానాలను కూడా కొండా సురేఖ వ్యక్తం చేస్తున్నట్లు తెలుస్తోంది. తెలంగాణపై స్పష్టమైన అనుకూలతను వైయస్ జగన్ వ్యక్తం చేయకపోతే తెలుగుదేశం పార్టీ నాయకులకు వచ్చిన కష్టాలే తమకు వస్తాయని ఆమె భావిస్తున్నారట. దీంతో ఆమె జగన్ వైఖరి పట్ల అసంతృప్తి వ్యక్తం చేస్తున్నట్లు చెబుతున్నారు.

Published On July 4, 2011