వైయస్ జగన్‌కు కొర్ల భారతి రాంరాం?

By Pratap

Published: Thursday, November 10, 2011, 8:31 [IST]

కొన్నాళ్లు గడిస్తే వారు వీరవుతారన్నట్లు శ్రీకాకుళం జిల్లా టెక్కలి శాసనసభ్యురాలు కొర్ల భారతి తిరిగి కాంగ్రెసులోకి రావాలని అనుకుంటున్నారట. వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి ఆమె టాటా చెప్పేయడానికి సిద్ధపడినట్లు చెబుతున్నారు. గత ఎన్నికల్లో ప్రజారాజ్యం పార్టీ తరఫున పోటీ చేసినన దువ్వాడ శ్రీనివాస్ చిరంజీవితో పాటు కాంగ్రెసులోకి రాకుండా వైయస్సార్ కాంగ్రెసు గూటికి చేరుకున్నారు. దీంతో ఆమెకు కాంగ్రెసులో పెద్దగా ఇబ్బంది ఉండదు.

కొర్ల భారతిని తిరిగి పార్టీలోకి ఆహ్వానించడానికి జిల్లా మంత్రి ధర్మాన ప్రసాద రావు, పార్లమెంటు సభ్యురాలు కిల్లి కృపారాణి నిండు మనసుతో సిద్ధంగా ఉన్నట్లు చెబుతున్నారు. వైయస్సార్ కాంగ్రెసు పార్టీ వ్యవహారాల తీరు మాత్రమే కాకుండా వైయస్ జగన్ కేసుల్లో ఇరుక్కుంటుండడంతో రాజకీయ భవిష్యత్తుపై కొర్ల భారతికి తన భవిష్యత్తుపై ఆలోచన చెలరేగి సొంత గూటికి రావాలని అనుకుంటున్నట్లు వార్తలు వస్తున్నాయి.

Published On November 10, 2011