బాబు కోసం అమితాబ్‌ను వాడిన ఎన్టీఆర్?

By Pratap

Published: Thursday, November 3, 2011, 9:40 [IST]

పోయిన మంత్రి పదవిని తిరిగి తన అల్లుడు చంద్రబాబుకు ఇప్పించడానికి స్వర్గీయ ఎన్టీ రామారావు బాలీవుడ్ సూపర్ స్టార్ అమితాబ్ బచ్చన్‌ను వాడారట. ఈ మాట చెప్పింది ఎవరో కాదు, తెలుగుదేశం పార్టీ అధికారికంగా నిర్వహించే వెబ్‌సైట్‌లో రాసిన వ్యాసంలోనే చంద్రబాబు చెప్పించారు. స్వర్గీయ టి. అంజయ్య మంత్రివర్గంలో సభ్యుడిగా ఉన్న చంద్రబాబును చిత్తూరు జిల్లా పరిషత్ ఎన్నికల్లో అధికార కాంగ్రెసు పార్టీకి వ్యతిరేకంగా పనిచేసినందుకు తొలగించారు. దాంతో ఎన్టీ రామరావు రంగంలోకి దిగారట.

అమితాబ్‌తో తనకు ఉన్న పరిచయాన్ని వాడుకుని ఎన్టీ రామరావు తన అల్లుడు, అప్పటి కాంగ్రెసు నాయకుడు చంద్రబాబుకు తిరిగి మంత్రి పదవి ఇప్పించారని ఆ వ్యాసంలో రాశారు. రాజకీయాలు ఎలా నడుస్తాయో తెలిసిన ఎన్టీ రామరావు వాటిని మార్చడానికి తెలుగుదేశం పార్టీని స్థాపించారట. అప్పటి రాజకీయం అంటే నలుగురు నాయకులు హైదరాబాదులో కూర్చుని స్వార్థ ప్రయోజనాల కోసం వినోదప్రాయంగా నడిచే చదరంగమని ఎన్టీ రామారావుకు జ్ఞానోదయమైందట. ఏమైనా, ఈ వ్యాసం చంద్రబాబును పైకెత్తినట్లు లేదు గానీ ఎన్టీ రామారావును తగ్గించే విధంగా మాత్రం ఉందనే వ్యాఖ్యానాలు వినిపిస్తున్నాయి.

Published On November 3, 2011