విలీనంపై సందిగ్ధంలో చిరంజీవి?

By Srinivas

Published: Friday, August 5, 2011, 9:01 [IST]

కాంగ్రెసు పార్టీలో ప్రజారాజ్యం పార్టీ విలీనం మళ్లీ సందిగ్ధంలో పడినట్టుగా కనిపిస్తోంది. తాను స్థాపించిన పిఆర్పీని కాంగ్రెసు పార్టీలో విలీనం చేస్తున్నట్టు చిరంజీవి ప్రకటించిన తర్వాత ఎప్పుడు విలీనం చేద్దామన్న ఏదో ఒక సమస్య వచ్చి పడుతుంది. అయితే రెండు రోజుల క్రితం మాత్రం అధిష్టానం నుండి చిరంజీవికి పిలుపు వచ్చింది. ఈ నెల 6వ తారీఖు నుండి 10వ తారీఖు మధ్య వీలు చూసుకొని రావాల్సిందిగా ఆహ్వానించింది. ఏఐసిసి అధ్యక్షురాలు సోనియా గాంధీ సమక్షంలో పార్టీ సభ్యత్వం తీసుకోవాలని అదే సమయంలో ప్రజారాజ్యం పార్టీ శాసనసభ్యులు, శాసనమండలి సభ్యులు ప్రదేశ్ కాంగ్రెసు కార్యాలయంలో, జిల్లా స్థాయి నేతలు డిసిసి కేంద్రాల్లో పార్టీ తీర్థం పుచ్చుకోవాలని దాదాపు నిర్ణయం అయిపోయింది.

అయితే సోనియా గాంధీ అనుకోకుండా శస్త్ర చికిత్స కోసం విదేశాలకు వెళ్లడంతో మరోసారి విలీనంపై నీలి నీడలు కమ్ముకున్నాయి. సోనియా ఉండి ఉంటే ఈ నెల 8 నుండి 10 మధ్య సభ్యత్వ ప్రక్రియ పూర్తయ్యేది. సోనియా శస్త్ర చికిత్స అనంతరం 3 వారాల పాటు అక్కడే విశ్రాంతి తీసుకోనున్నారు. ఈ నేపథ్యంలో మరో నెల రోజుల పాటు ఆగాల్సి ఉంటుంది. అలా ఆగాలా? లేదా సోనియా తాను వెళ్లే ముందు కేర్ టేకర్ కమిటీని నియమించినందున ఆ కమిటీ సమక్షంలో పార్టీ తీర్థం పుచ్చుకోవాలా? అనే మీమాంసలో ఇటు చిరు వర్గాలు, అటు కాంగ్రెసు వర్గాలు ఉన్నట్టుగా తెలుస్తోంది. శుక్రవారం పిసిసి చీఫ్ బొత్సతో చిరు భేటీ అయి నిర్ణయం తీసుకోనున్నారు. కాగా కేర్ టేకర్ కమిటీలో రాహుల్ గాంధీ ఉన్న కారణంగా సోనియా వచ్చే వరకు ఆగాల్సిన ఆవశ్యకత లేదని పలువురు భావిస్తున్నట్టుగా తెలుస్తోంది.

Published On August 5, 2011