బాలకృష్ణకు రాజయోగం, అందుకే దూకుడు?

తెలుగుదేశం పార్టీ నాయకుడు, ప్రముఖ సినీ హీరో బాలకృష్ణకు రాజయోగం పట్టనుందనే ప్రచారం జోరందుకుంది. బాలయ్యకు రాజయోగం పడుతుందని జ్యోతిష్కులు చెప్పారట. అందుకే బాలయ్య ఈ మధ్య రాజకీయాలకు సంబంధించి దూకుడుగా వ్యవహరిస్తున్నారని అంటున్నారు. తాను వచ్చే ఎన్నికల్లో పోటీ చేస్తానని ప్రకటించిన ఆయన అందుకు అవసరమైన రంగం సిద్ధం చేసుకుంటున్నట్లు చెబుతున్నారు. తెలుగుదేశం పార్టీకి ప్రచారం చేసేందుకు మాత్రమే పరిమితం కాకుండా ఎన్నికల్లో పోటీ చేసి అధికారాన్ని సొంతం చేసుకోవాలనే ఆలోచనలో ఆయన ఉన్నట్లు తెలుస్తోంది.

ఇటీవల తాను నిర్వహిస్తున్న ట్రస్టుకు తన అభిమానులను పిలిపించుకుని ఆయన సుదీర్ఘ సమావేశం నిర్వహించారని చెబుతున్నారు. అంతేకాకుండా ట్రస్టులో వారికి సభ్యత్వం ఇస్తానని కూడా చెప్పారు. దీన్నిబట్టి రాజకీయాల్లో కీలక పాత్ర పోషించడానికి అవసరమైన యంత్రాంగాన్ని విడిగా ఆయన ఏర్పాటు చేసుకుంటున్నట్లు అర్థమవుతోందని అంటున్నారు. ఇది తెలుగుదేశం పార్టీ అధ్యక్షుడు నారా చంద్రబాబు నాయుడుకు చెక్ పెట్టేందుకా, చంద్రబాబును అధికారంలోకి తెచ్చేందుకా అనే ప్రశ్న ఉత్పన్నమవుతోంది. బాలయ్య తీరు చూస్తుంటే తనకు తాను ముందుకు రావాలనే ఆలోచనలో ఉన్నట్లే కనిపిస్తోందని అంటున్నారు.

English summary

It is learnt that hero Balakrishna wants to come to fore front in politics.