వడివేలుపై రజనీ ఫ్యాన్స్ గరం

By Pratap

Published: Monday, May 2, 2011, 8:38 [IST]

బంతిని గోడకు కొట్టినట్లే వడివేలుపై తమిళ సూపర్ స్టార్ అభిమానులు మండిపడుతున్నారు. తమ నటుడిపై చిందులు తొక్కిన హాస్య నటుడు వడివేలుకు వారు తీవ్ర హెచ్చరికలు చేశారు. రజనీకాంత్ హీరోగా నటిస్తున్న రాణా చిత్రం నుంచి తనను తొలగించడంపై వడివేలు తీవ్ర వ్యాఖ్యలు చేశారు. మే 13వ తేదీ తర్వాత సినిమాల్లో సీన్లు, సీజన్లు మారిపోతాయని, ఆ రోజు ఎవరి సంగతేమిటో చూస్తానని వడివేలు రజనీకాంత్‌పై భగ్గుమన్నారు.

రజనీకాంత్‌తో పెట్టుకుంటే ఏమవుతుందో వడివేలు చవి చూస్తున్నారు. మూడు తరాల హీరోలలో ఇప్పటికీ అగ్రస్థానంలో నిలుస్తున్న రజనీకాంత్ ఎక్కడ, నిన్న గాక మొన్న వచ్చిన కామెడీ బుడ్డోడు ఎక్కడ అంటూ వడివేలును ఉద్దేశించి వారు వ్యాఖ్యానించారు. ఈ మేరకు ఆదివారం తిరుచ్చి జిల్లాలో పోస్టర్లు వెలిశాయి. ఇప్పటికే డిఎండికె నేత, హీరో విజయకాంత్ అభిమానులు వడివేలును బెదిరిస్తున్నారు. ఈ స్థితిలో నిజంగానే వడివేలు పరిస్థితి కామెడీ పాత్ర అయిపోయింది.

Published On May 2, 2011