ఫోన్లే కాదు పెన్నులూ వద్దంటున్న శంకర రావు!

By Srinivas

Published: Sunday, December 18, 2011, 10:28 [IST]

చేనేత, జౌళీ శాఖ మంత్రి శంకర రావు ఏం చేసినా వెరైటీగానే ఉంటుంది. ఆయన తన వైఖరి ద్వారా ఎప్పుడూ మీడియాలో నానుతూ ఉంటారు. సాధారణంగా మంత్రులు తన ఛాంబర్లలోకి అధికారులను ఫోన్లతో అనుమతించరు. అది మామూలే. కానీ తాజాగా శంకర రావు మాత్రం తన కార్యాలయానికి ఓ నోటీసు బోర్డు తగిలించారు. అందులో తన కార్యాలయంలోకి వచ్చే అధికారులు ఎవరూ ఫోన్లతో పాటు పెన్నులు తీసుకు రావద్దని సూచించారట. ఫోన్లు తీసుకు రావద్దని చెప్పడం మామూలే కానీ పెన్నులు వద్దని చెప్పడం ఏమిటో అని సచివాలయంలో చర్చించుకుంటున్నారట. అయితే మీడియా ప్రతినిధులకు మాత్రం మినహాయింపు ఇచ్చారు.

హైదరాబాదీలు ఉదయం పది గంటల వరకు లేవరు సాయంత్రం ఏడు గంటల తర్వాత కనిపించరన్న శంకర రావు అందరు మంత్రులకు భిన్నంగా పలుమార్లు సాయంత్రం ఏడు గంటలకు వచ్చి పదిగంటల వరకు పని చేసిన సందర్భాలు కూడా ఉన్నాయట. సహచర మంత్రులపై ఫిర్యాదులు, ముఖ్యమంత్రి కిరణ్ కుమార్ రెడ్డిపై విమర్శలు, స్వయంగా నేను మంత్రి పదవిని వదలను ముఖ్యమంత్రే తనను తప్పించాలని, మంత్రిగా ఉండే కంటే మామూలు ఎమ్మెల్యేగా ఉంటేనే ప్రజలకు చాలా చేయవచ్చునని, మీడియా ప్రతినిధులను బహిష్కరిస్తాననడం ఇలా శంకర రావు ఏం చేసినా ఇలా ఏం మాట్లాడినా ఆసక్తికరంగానే ఉంటుంది. తాజాగా పెన్ను విషయం అందరిలో మరింత ఆసక్తి రేపుతోందట.

Published On December 18, 2011