చంద్రబాబుకు సర్వేల తలనొప్పి?

ఇటీవల వస్తున్న కొన్ని సర్వే ఫలితాలు రాష్ట్రంలో ప్రధాన ప్రతిపక్షం అయిన తెలుగుదేశం పార్టీని కొంత ఆందోళనకు గురి చేస్తున్నట్టుగా తెలుస్తోంది. ఇటీవల ఓ ప్రముఖ జాతీయ ఛానెల్ రాష్ట్రంలో సర్వే చేసిందట. ఆ సర్వేలో అటు తెలంగాణలోనూ, ఇటు సీమాంధ్ర ప్రాంతంలోను మూడో స్థానానికి పడిపోయిందని తేలిందట. తెలంగాణ తెలంగాణ ఉద్యమం తీవ్రంగా ఉన్న దృష్ట్యా తెలంగాణ రాష్ట్ర సమితి తదితర తెలంగాణ వాద పార్టీలు బాగా పుంజుకోగా, సీమాంధ్ర ప్రాంతంలో వైయస్ జగన్మోహన్ రెడ్డి స్థాపించిన వైయస్సాఆర్ కాంగ్రెసు పార్టీ రోజు రోజుకు బలపడుతోంది. దీంతో తెలుగుదేశం పార్టీ పరిస్థితి అగమ్య గోచరంగా తయారయినట్టుగా కనిపిస్తోంది. అందుకే సర్వేలో టిడిపి రెండు ప్రాంతాలలోనూ మూడో స్థానానికే పడిపోయిందట.

సర్వేలపై టిడిపిలో ఎంతగా ఆందోళన ఉందంటే.. టిడిపి మీడియా కమిటీ సమావేశంలో సాక్షాత్తూ ఆ పార్టీ అధినేత చంద్రబాబు నాయుడు ఆ విషయాన్ని ప్రస్తావించారట. అయితే సర్వేల ఫలితాలపై టిడిపిలోనూ భిన్నాభిప్రాయాలు వెల్లడవుతున్నాయి. కొంతమంది వ్యక్తులను ప్రమోట్ చేయడానికి సర్వేల పేరుతో క్యాష్ చేసుకోవాలని చూస్తున్నారని, అలాంటి వాటిని నమ్మాల్సిన పరిస్థితి లేదని, అంతేకాకుండా సమయం, సందర్భం లేకుండా సెంటిమెంటు తదితర అంశాల ప్రాతిపదికన చేసే సర్వేలను లెక్కలోకి తీసుకోవాల్సిన అవసరం లేదని కొట్టిపారేస్తున్నారు. మరికొందరు తమ్ముళ్లు మాత్రం సర్వేలను పూర్తిగా దూరం పెట్టకుండా పార్టీని మరింత బలోపేతం చేసే విధంగా కార్యాచరణ రూపొందించుకొని ముందుకు వెళితే మంచిదని భావిస్తున్నట్టుగా తెలుస్తోంది.

English summary

Telugudesam party getting new headache with surveys. The surveys revealing that the TDP will get 3rd place in Telangana and Seemandhra if elections come.