నాగంపై పోటీకి ముందుకు వెనక్కి

మాజీ మంత్రి, తెలంగాణ నగారా సమితి అధ్యక్షుడు నాగం జనార్ధన్ రెడ్డి పైన పోటీకి తెలుగుదేశం, తెలంగాణ రాష్ట్ర సమితి తర్జన భర్జన పడుతున్నాయి. తెలంగాణపై చంద్రబాబుది రెండు కళ్ల సిద్ధాంతమంటూ టిడిపిని వీడి బయటకు వచ్చిన నాగంపై నాగర్‌కర్నూల్‌లో పోటీ పెట్టడానికి పార్టీలు ముందుకి వెనక్కి పోతున్నాయి. నాగంపై పోటీ పెడతామని టిడిపి ఎప్పుడో ప్రకటించింది. అయితే ఉప ఎన్నికలకు సమాయత్తమవుతున్న టిడిపి అన్ని నియోజకవర్గాల్లో అభ్యర్థులను దాదాపు ఖరారు చేసినప్పటికీ నాగర్‌కర్నూలులో మాత్రం ఇంకా ఖరారు చేయలేక పోయింది. టిటిడిలోనూ పోటీ పెట్టాలని కొందరు వద్దని మరికొందరు అభిప్రాయపడుతున్నారట.

ఇక టిఆర్ఎస్‌లోనూ ఇదే గందరగోళం నెలకొంది. సాధ్యమైనంత ఎక్కువ సీట్లు గెలుచుకోవాలనే లక్ష్యంతో ఉన్న టిఆర్ఎస్ నాగంపై పోటీ విషయంలో మాత్రం ఏమీ తేల్చుకోలేక పోతుంది. తెలంగాణ కోసమే టిడిపిని వీడిన నాగంపై పోటీ పెడితే తెలంగాణ ప్రజలకు తమ పట్ల విశ్వాసం సన్నగిల్లుతుంది, అదే సమయంలో పోటీ పెట్టకుంటే పార్టీ స్థానిక క్యాడర్‌లో ఉత్సాహం సన్నగిల్లుతుందనే ఆందోళనలో కొట్టుమిట్టాడుతోంది. మొత్తానికి నాగంపై పోటీకి టిఆర్ఎస్, టిడిపి పెద్ద సవాల్‌గానే మారిందని చెప్పవచ్చు.

English summary

TDP and TRS are in dilemma to contest from Nagarkurnool on Nagam Janardhan Reddy.