కెసిఆర్‌కు టోకరా, బిజెపిలోకి రాములమ్మ?

By Pratap

Published: Friday, October 14, 2011, 9:06 [IST]

రాష్ట్రంలో బిజెపి పావులు కదుపుతున్న సూచనలు కనిపిస్తున్నాయి. తెలంగాణ అంశాన్ని అసరా చేసుకుని రాష్ట్రంలో బలపడే వ్యూహాన్ని బిజెపి రచిస్తున్నట్లు సమాచారం. ఇందులో భాగంగానే తెలంగాణ రాష్ట్ర సమితి (తెరాస) పార్లమెంటు సభ్యురాలు రాములమ్మను తిరిగి పార్టీలోకి ఆహ్వానించినట్లు తెలుస్తోంది. పార్టీలో తీవ్ర ఆసంతృప్తితో ఉన్న విజయశాంతి కమలం వైపు ఎప్పుడో దృష్టి సారించినట్లు చెబుతున్నారు. అయితే, ఆమె ఇప్పుడిప్పుడే బిజెపిలోకి వెళ్లే ఆలోచనలో లేరు. వచ్చే ఎన్నికల నాటికి తట్టా బుట్ట సర్దుకుని బిజెపి పంచన చేరుతారని అంటున్నారు.

వైయస్ రాజశేఖర రెడ్డి హయాంలో నిజానికి ఆమె కాంగ్రెసులోకి దూకాల్సి ఉండింది. వైయస్ మరణంతో ఆ దూకుడుకు కళ్లెం పడింది. తెరాసలోనే ఆమె అణగిమణకి కాలం వెళ్లదీస్తున్నారు. పార్టీ బహిరంగ సభల్లో విజయశాంతిని కెసిఆర్ పక్కనే కూర్చుండబెట్టుకున్నారు, చెల్లెలిగా మర్యాద ఇస్తున్నారు. కానీ మాట్లాడేందుకు మాత్రం సుతారాం అవకాశం ఇవ్వడం లేదు. గుండె భగభగ మండిపోతున్నా కాలం కలసి రానప్పుడు ఏం చేస్తామనే నిర్వేదంతో ఆమె తెరాసలో కొనసాగుతున్నట్లు చెబుతున్నారు. వచ్చే ఎన్నికల్లో సుష్మా స్వరాజ్‌ తెలంగాణలోని ఏదో ఒక నియోజకవర్గం నుంచి లోకసభకు పోటీ చేసే అవకాశాలున్నాయి. ఆమెకు విజయశాంతి గ్లామర్ తోడైతే బిజెపి ముందుకు సాగుతుందని అంటున్నారు.

Published On October 14, 2011