జెపి తెలంగాణ పాట వెనక...?

By Pratap

Published: Monday, December 19, 2011, 11:16 [IST]

సమైక్యవాద గళాన్ని వినిపిస్తూ వచ్చిన లోకసత్తా అధ్యక్షుడు జయప్రకాష్ నారాయణ ఇటీవల తెలంగాణ పాట ఎత్తుకున్నారు. ఈ మలుపు అందర్నీ ఆశ్చర్యపరిచింది. ఆ మాటల వెనక ఆంతర్యమేమిటనేది కూడా చర్చనీయాంశంగా మారింది. తెలంగాణకు అనుకూలంగా కాంగ్రెసు అధిష్టానం నిర్ణయం తీసుకునే అవకాశం లేదు కాబట్టి తెలంగాణ ప్రజల మనసు దోచుకోవడానికి తెలంగాణకు అనుకూలంగా మాట్లాడారా అనే అనుమానాలు వ్యక్తమవుతున్నాయి. తెలంగాణ రాష్ట్రం ఏర్పాటు వల్ల సమస్యలు పరిష్కారం కావంటూ ఆయన తెలంగాణకు వ్యతిరేకంగా మాట్లాడుతూ వచ్చారు. ఇటీవల ఖమ్మం పర్యటనలో మాత్రం తెలంగాణ రాష్ట్రం ఏర్పాటు చేస్తే తనకు అభ్యంతరం లేదని ఓ స్పష్టమైన ప్రకటన చేశారు.

జెపిగారి మాటల వెనక మర్మం మరోటి కూడా ఉందని అంటున్నారు. ఉప ఎన్నికలు వస్తున్న నేపథ్యంలో తన పార్టీ అభ్యర్థులకు మద్దతుగా, తన పర్యటనలకు మద్దతుగా తెలంగాణ యువతను తిప్పుకునే ఎత్తుగడ కూడా ఉందనే సందేహాలు వ్యక్తమవుతున్నాయి. తెలంగాణలో ఓట్లు రాల్చుకోవడానికి తెలంగాణకు అనుకూలమైన వైఖరి తీసుకోవడం తప్ప మరో మార్గం కనిపించడం లేదు. తాను గెలిచే అవకాశం లేకపోయినా, తెలంగాణ రాష్ట్ర సమితి (తెరాస) ఓట్లను చీల్చడానికి జెపిగారి ప్రకటన పనికి వస్తుందని అంటున్నారు.

Published On December 19, 2011