వైయస్ జగన్‌కు ద్వారంపూడి టోకరా?

By Pratap

Published: Tuesday, September 20, 2011, 8:31 [IST]

ఆరు నూరైనా, నూరు ఆరైనా వైయస్సార్ కాంగ్రెసు పార్టీ అధ్యక్షుడు వైయస్ జగన్ వెంట ఉంటారని భావించిన శాసనసభ్యుడు ద్వారంపూడి చంద్రశేఖర రెడ్డి ఆ నమ్మకాన్ని వమ్ము చేసేట్లున్నారు. ఆయన వైయస్ జగన్‌కు ఝలక్ ఇచ్చేట్లే ఉన్నారు. ఆయన సోమవారంనాడు ముఖ్యమంత్రి కిరణ్ కుమార్ రెడ్డిని కలిశారు. క్యాంపు కార్యాలయంలో ముఖ్యమంత్రిని కలవడానికి ఆయన గంటన్నరకు పైగా నిరీక్షించాల్సి వచ్చిందట. అయినా తన పట్టు వీడలేదు.

అప్పట్లో ముత్తా గోపాలకృష్ణను పక్కన పెట్టి వైయస్ జగన్ ప్రోద్బలంతో వైయస్ రాజశేఖర రెడ్డి ద్వారంపూడి చంద్రశేఖర రెడ్డికి కాకినాడ శాసనసభ టికెట్ ఇప్పించారని అంటారు. వైయస్ జగన్ వల్లనే ఆయన ఎమ్మెల్యే కాగలిగారనేది అందరికీ తెలిసిన విషయమే. ఆయనే ఇప్పుడు జగన్‌కు టోకరా ఇవ్వాలని అనుకుంటుంటే మిగతావారి పరిస్థితి ఏమిటనేది ప్రశ్న.

Published On September 20, 2011