వైయస్ జగన్ మైండ్ గేమ్

By Pratap

Published: Tuesday, May 24, 2011, 9:16 [IST]

తన పార్టీలోకి బలమైన నాయకులను రప్పించుకునేందుకు వైయస్సార్ కాంగ్రెసు పార్టీ అధ్యక్షుడు వైయస్ జగన్ విచిత్రమైన వ్యూహాన్ని అనుసరిస్తున్నారని వినికిడి. తెలుగుదేశం, కాంగ్రెసు పార్టీల్లోని జిల్లా, నియోజకవర్గాల స్థాయిల్లో బలమైన నాయకులను గుర్తించి గాలం వేస్తున్నారని చెబుతున్నారు. వారితో వైయస్సార్ కాంగ్రెసు పార్టీ నాయకులు ఫోన్లలో మంతనాలు జరిపి తమ వైపు రావాలని ఆహ్వానిస్తున్నారని తెలుస్తోంది. వారు అంగీకరించకపోతే వారిపై మైండ్ గేమ్ ఆడుతున్నట్లు చెబుతున్నారు.

బలమైన నాయకులను గుర్తించి వారు వైయస్సార్ కాంగ్రెసు పార్టీలోకి రాబోతున్నట్లు ప్రచారం సాగిస్తున్నారట. ఈ ప్రచారం కూడా వైయస్సార్ కాంగ్రెసు పార్టీ నాయకులే చేస్తున్నారు. దీంతో ఆ నాయకులపై సొంత పార్టీల్లో అపనమ్మకం ఏర్పడుతుంది. ఆ నాయకుల విశ్వసనీయత ప్రమాదంలో పడుతుంది. దాన్ని ఆసరాగా తీసుకుని వారికి గాలం వేస్తున్నట్లు చేస్తున్నారు. ఏమైనా, రాజకీయాల్లో కొత్త రకం ఎత్తుగడలకు వైయస్ జగన్ పూనుకున్నారని చెప్పవచ్చు.

Published On May 24, 2011