వైయస్ జగన్ వర్గం ఎమ్మెల్యే సాకు

By Pratap

Published: Saturday, December 3, 2011, 11:30 [IST]

వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శానససభ్యులు అవిశ్వాసానికి వ్యతిరేకంగా ఓటేయడానికి సాకులు వెతుకున్నట్లు కనిపిస్తోంది. శ్రీకాకుళం జిల్లాకు చెందిన శాసనసభ్యుడు ధర్మాన కృష్ణ ప్రసాద్ మాటలను బట్టి అలా అనిపిస్తోంది. దివంగత నేత వైయస్ రాజశేఖర రెడ్డిపై దుమ్మెత్తిపోస్తూ తెలుగుదేశం పార్టీ ప్రతిపాదించిన అవిశ్వాస తీర్మానానికి మద్దతివ్వడం సరి కాదని ఆయన అంటున్నారు. ఈసారి ప్రభుత్వానికి మద్దతిస్తే మంచిదని ఆయన అభిప్రాయపడుతున్నారు. వచ్చే సమావేశాల్లో మనమే ప్రభుత్వంపై అవిశ్వాసం ప్రతిపాదిద్దామని తాను జగన్‌కు సూచిస్తానని అంటున్నారు.

అంతిమ నిర్ణయం వైయస్ జగన్‌దేనని ఆయన అంటున్నప్పటికీ ప్రభుత్వానికి అనుకూలంగా వ్యవహరించాలనే అభిప్రాయం మాత్రం స్పష్టంగా తెలిసిపోతోంది. తెలుగుదేశం పార్టీ అధ్యక్షుడు నారా చంద్రబాబు నాయుడు ప్రతిపాదించిన అవిశ్వాసానికి తాము మద్దతివ్వడమేమిటని ఆయన అడుగుతున్నారు. అయితే, అవిశ్వాసానికి మద్దతుగా ఓటేయాలని జగన్ చెప్తే అలాగే చేస్తానని ఆయన చెప్పారు. మొత్తం మీద, ప్రభుత్వానికి అనుకూలంగా వ్యవహరించడానికి జగన్ వర్గానికి చెందిన చాలా మంది శానససభ్యులు సిద్ధంగా ఉన్నట్లు అర్థమవుతోంది.

Published On December 3, 2011