పవర్ స్టార్ సినిమా: జగన్ పార్టీతో పూరీ లింక్స్
పూరీ జగన్నాథ్ సోదరుడు గణేష్ వైయస్సార్ కాంగ్రెసు పార్టీలో ఉన్నారు. ఇదే విషయంపై శుక్రవారం పూరీ జగన్నాథ్కు మీడియా ప్రతినిధుల సమావేశంలో ప్రశ్నలు ఎదురయ్యాయి. వాటికి ఆయన సమాధానం చెప్పడానికి నిరాకరించారు. పైగా, తనను రెచ్చగొట్టే విధంగా మాట్లాడవద్దని ఓ మీడియా ప్రతినిధికి సలహా ఇచ్చారు. ఆ సలహా ఇస్తూ మీడియా సమావేశం నుంచి లేచి వెళ్లిపోయారు. కెమెరామెన్ గంగతో రాంబాబు సినిమా వివాదంపై మాట్లాడడానికి ఆయన ఈ మీడియా సమావేశం ఏర్పాటు చేశారు.
కాగా, ఉప ఎన్నికల సందర్భంగా ఈ ఏడాది మేలో నర్సీపట్నంలోని పూరీ జగన్నాథ్ ఇంట్లో వైయస్ విజయమ్మ, షర్మిల బస చేశారు. దానికి పూరీ జగన్నాథ్ ఎంతో మురిసిపోయారు కూడా. విజయమ్మ, తమ ఇంట్లో బస చేయడం తనకెంతో ఆనందాన్నిస్తోందని, తామంతా వారి కుటుంబాన్ని ఎంతో ప్రేమిస్తామని ఆయన పొంగిపోయారు.
పూరీ జగన్నాథ్ అనుబంధం ఈనాటిది కాదు. పూరీ జగన్నాథ్ కూతురు జన్మదిన వేడులకు వైయస్ జగన్ హాజరయ్యారు. అది అప్పట్లో పెద్ద సంచలమైంది. పూరీ సంతోషంపై ప్రముఖ దర్సక నిర్మాత రామ్ గోపాల్ వర్మ వ్యంగ్యాస్త్రాలు కూడా విసిరారు. ఏమైనా, కెమెరామెన్ గంగతో రాంబాబు సినిమాలో అటు చంద్రబాబును, ఇటు కెసిఆర్ను ఏకి పారేయడం ద్వారా వైయస్సార్ కాంగ్రెసుతో తనకున్న అనుబంధాన్ని పూరీ జగన్నాథ్ చాటుకున్నారనే వ్యాఖ్యలు వినిపిస్తున్నాయి. సినిమాలో తాను చంద్రబాబును విమర్శించలేదని, తెలంగాణ ప్రస్తావనే లేదని పూరీ ఎంతగా చెప్పినా చింత చచ్చినా పులుపు చావదనే సామెతను గుర్తు చేస్తున్నారు.
Click it and Unblock the Notifications
Sign in with Google