చంద్రబాబుకూ తప్పని చెప్పుల బెడద

తెలంగాణపై ఎంత బోల్డ్ స్టేట్‌మెంట్స్ ఇచ్చినా తెలుగుదేశం పార్టీ అధ్యక్షుడు నారా చంద్రబాబు నాయుడికి తెలంగాణ సెగ తప్పడం లేదు. నిజామాబాద్ జిల్లా కామారెడ్డి ఉప ఎన్నిక ప్రచారానికి వచ్చిన చంద్రబాబుకు తెలంగాణ సెగ తాకింది. తెలంగాణవాదులు కొన్నిచోట్ల చెప్పులు విసిరారు. భిక్కనూరులో చంద్రబాబు విద్యుత్ గురించి మాట్లాడుతుండగా - పెద్దబాల్‌రెడ్డి, సాయిలు అనే రైతులు.. "మీ ప్రభుత్వంలో మోటార్ల బాక్స్‌లు తీసుకెళ్లి, కేసులు పెట్టి, ఇప్పుడు రైతుల గురించి మాట్లాడుతున్నావా?'' అని ప్రశ్నించారు.

"తెలంగాణకు ఎందుకు వచ్చావ్? ఆంధ్రాబాబు గోబ్యాక్'' అంటూ సాయిలు నినాదాలు చేశాడు. దీంతో పోలీసులు వారిని అక్కడి నుంచి పక్కకు తీసుకెళ్లారు. మాచారెడ్డి మండలంలోని ఫరీద్‌పేటలో యువకులు నినాదాలు చేశారు. దీంతో బాబు పోలీసులపై మండిపడ్డారు. "ఇదేనా మీ ఎన్నికల భద్రత?'' అని నిలదీశారు. తర్వాత అక్కడినుంచి బాబు వాహనం ముందుకు వెళ్లగానే యువకులు తెలంగాణ నినాదాలు చేస్తూ వెనుక వచ్చిన జర్నలిస్టుల వాహనాలు, ఇతర ప్రైవేటు వాహనాలపై రాళ్లు, చెప్పులు విసిరారు.

English summary

Telugudesam president N Chandrababu naidu has faced opposition from Telanganites at Kamareddy of Nizamabad district.