మహేష్ బాబుకు కాంగ్రెసు గాలం?

By Pratap

Published: Monday, January 9, 2012, 10:16 [IST]

వరుస విజయాలతో దూకుడు మీద ఉన్న ప్రిన్స్ మహేష్ బాబుకు గాలం వేయడానికి కాంగ్రెసు పార్టీ ప్రయత్నాలు చేస్తోంది. ఈ విషయంలో ముఖ్యమంత్రి కిరణ్ కుమార్ రెడ్డి ప్రత్యేక శ్రద్ధ చూపుతున్నట్లు సమాచారం. విజయనిర్మల, ఆమె కుమారుడు నరేష్ వైయస్సార్ కాంగ్రెసుకు దగ్గరైనప్పటికీ మహేష్ బాబు తమ వైపు ఉంటారని కిరణ్ కుమార్ నమ్ముతున్నారు. మహేష్ బాబు తండ్రి కృష్ణ సోదరుడు శేషగిరి రావు కాంగ్రెసు పార్టీతోనే ఉంటూ వస్తున్నారు. పార్టీలో ఆయన కొన్ని పదవులు కూడా నిర్వహించారు. దాన్ని ఆసరా చేసుకుని మహేష్ బాబును కాంగ్రెసుకు అనుకూలంగా మలుచుకోవాలనే ఆలోచనలో ముఖ్యమంత్రి ఉన్నట్లు తెలుస్తోంది.

ముఖ్యమంత్రికి అత్యంత సన్నిహతుడైన ఎమ్మెల్సీ రంగా రెడ్డి మాటలను బట్టి ఆ విషయం అర్థమవుతోంది. మహేష్ బాబు పార్టీలోకి వస్తే తగిన స్థానం కల్పిస్తామని ఆయన ఓ మీడియా చానెల్‌తో అన్నారు. శేషగిరి రావు మొదటి నుంచీ కాంగ్రెసులోనే ఉంటూ వస్తున్నారని, కృష్ణ కుటుంబానికి కాంగ్రెసుతో అనుబంధం ఉందని ఆయన అన్నారు. అయితే, మహేష్ బాబుకు మాత్రం రాజకీయాల పట్ల పెద్దగా ఆసక్తి లేనట్లు అనిపిస్తోంది. ఆయన గతంలో పలు మార్లు ఆ విషయం చెప్పారు. ఏమైనా, ఎప్పుడు ఏమవుతుందో రాజకీయాల్లో చెప్పలేం.

Published On January 9, 2012