నందమూరి హరికృష్ణ కారప్పూస స్టోరీ

By Pratap

Published: Saturday, January 14, 2012, 10:27 [IST]

బావ నారా చంద్రబాబు నాయుడిపై అలిగి ముభావంగా ఉంటూ వస్తున్న తెలుగుదేశం పార్టీ రాజ్యసభ సభ్యుడు నందమూరి హరికృష్ణ ఇటీవల జరిగిన పార్టీ పోలిట్‌బ్యూరో సమావేశం సందర్భంగా ఎక్కడ లేని ఉల్లాసంతో కనిపించారు. గెటప్ కూడా మార్చారు. ఫ్రెంచ్ కట్‌తో గడ్డాన్ని అందంగా తీర్చి దిద్దారు. పోలిట్‌బ్యూరో సమావేశంలో చాలా ఉత్సాహంగా కనిపించారు. బయట కూడా అంతే ఉత్సాహంగా కనిపించారు. మాజీ పోలీసు అధికారి, ప్రస్తుత పార్టీ నాయకుడు రావులపాటి సీతా రామారావును చూసి పాత కథను గుర్తు తెచ్చుకున్నారు. రావులపాటి అక్కడ ఉండగానే పార్టీ సీనియర్ నేత టి. దేవేందర్ గౌడ్‌తో కారప్పూస కథ చెప్పారు.

తన తండ్రి స్వర్గీయ ఎన్టీ రామారావు వద్దకు వచ్చినప్పుడు సీతారామారావు కారప్పూస తీసుకొచ్చారని, దాంట్లో కొంత తాను కొంత ఎన్టీ రామారావుకు ఇచ్చానని, దాన్ని తిని ఎన్టీ రామారావు ఎంతో మెచ్చుకున్నారని ఆయన చెప్పారు. దాంతో సీతారామారావు ఎప్పుడు వచ్చినా కారప్పూస అడిగేవాడినని, దాంతో ఆయన అప్పుడప్పుడు తెస్తూ ఉండేవారని హరికృష్ణ చెప్పారు. ఇప్పుడు సీతారామారావు వాటిని తేవడం మరిచిపోయారని చమత్కరించారట. దానికి సీతామారావు అదే స్థాయిలో హరికృష్ణపై చమత్కారం విసిరారట.

Published On January 14, 2012