చంద్రబాబుతో బాలయ్య విభేదిస్తున్నారా?

By Pratap

Published: Saturday, January 28, 2012, 9:44 [IST]

తమ పార్టీ అధ్యక్షుడు, బావ నారా చంద్రబాబు నాయుడితో తెలుగుదేశం పార్టీ నాయకుడు, సినీ హీరో బాలకృష్ణ విభేదిస్తున్నారా అనే ప్రశ్న ఉదయిస్తోంది. చంద్రబాబు ఒకటి తలిస్తే బాలకృష్ణ మరోటి తలుస్తారా అనే అనుమానాలు వ్యక్తమవుతున్నాయి. బాలకృష్ణ ఉప ఎన్నికల్లో పోటీ చేయబోరని చంద్రబాబు ప్రకటించిన తర్వాత కూడా తాను ఉప ఎన్నికల్లో పోటీ చేయడానికి సిద్ధంగా ఉన్నానని బాలకృష్ణ ప్రకటించారు. అయితే, పార్టీ ఆదేశిస్తే తాను ఉప ఎన్నికల్లో పోటీ చేస్తానని ఆయన చెప్పారు. అంటే, ఉప ఎన్నికల ద్వారానే శాసనసభలోకి అడుగు పెట్టి రాజకీయాల్లో చక్రం తిప్పాలనే ఆలోచనలో బాలకృష్ణ ఉండి ఉంటారనే అభిప్రాయాలు వ్యక్తమవుతున్నాయి.

ఇటీవల బాలకృష్ణ రాజకీయంగా అత్యంత చురుగ్గా వ్యవహరిస్తున్నారు. కేవలం పార్టీ కోసమే కాకుండా రాజకీయంగా తనకు పార్టీలో తగిన స్థానాన్ని ఆయన ఆశిస్తున్నారని చెబుతున్నారు. కాంగ్రెసు నాయకులు చిరంజీవిని మాత్రమే కాకుండా పార్లమెంటు సభ్యుడు లగడపాటి రాజగోపాల్‌ను కూడా ఆయన ఎదుర్కోవడానికి సిద్ధపడినట్లు చెబుతున్నారు. పార్టీలో కూడా బాలకృష్ణకు తగిన మద్దతిచ్చేవారు ఉన్నారు.

Published On January 28, 2012