లక్ష్మినారాయణ కాల్ డేటా: ఎస్పీ కాదా, డిటెక్టివ్‌నా?

సిబిఐ జాయింట్ డైరెక్టర్ లక్ష్మినారాయణ కాల్ డేటా రికార్డు లీక్‌పై మహారాష్ట్రలోని నాందేడ్ ఎస్పీ పాత్ర లేదని చెప్పేందుకు సిఐడి అధికారులు ప్రయత్నిస్తున్నారు. లక్ష్మీనారాయణ కాల్ డేటా రికార్డు లీకు వ్యవహారంలో నాందేడ్ ఎస్పీ పాత్ర లేదని, మహారాష్ట్రకు చెందిన డిటెక్టివ్ పాత్ర ఉన్నట్లు చెబుతున్నారు. ఇందుకు సంబంధించి సికింద్రాబాదులోని తిర్మల్‌గిరిలో గల ఓ డిటెక్టివ్‌ను సిఐడి అధికారులు ప్రశ్నిస్తున్నట్లు సమాచారం.

నాందేడ్ ఎస్పీ పాత్ర ఉన్నట్లు ఏ విధమైన ఆధారాలు లభించలేదని సిఐడి పోలీసు డైరెక్టర్ జనరల్ ఎస్ గోపాల్ రెడ్డి చెప్పినట్లు ఓ ప్రముఖ ఆంగ్లదినపత్రిక రాసింది. లక్ష్మినారాయణ కాల్ డేటా వివరాల కోసం నాందేడ్ ఎస్పీ రిక్వెస్ట్ పంపినట్లు ఆధారాలు లేవని, అయితే ఈ విషయంపై చర్చిస్తున్నామని ఆయన చెప్పారు. కావాలనే ఎస్పీ పాత్రను రహస్యంగా ఉంచుతున్నారనే విమర్శలు ఉన్నాయి.

ఎస్పీ స్థాయి అధికారికి కాల్ డేటా రికార్డు వివరాల కోసం రిక్వెస్ట్ పెట్టే అధికారం ఉంటుంది కాబట్టే దాన్ని రహస్యంగా ఉంచుతున్నట్లు ఒక వైపు నుంచి విమర్శలు వస్తున్నాయి. కాగా, లక్ష్మినారాయణ కాల్ డేటా లీకుపై దర్యాప్తు ఏ మేరకు ముందుకు సాగిందనే విషయాలు కూడా బయటకు రావడం లేదు.

కోర్టులో కేసు దాఖలు చేయడానికి వ్యాపారవేత్త రఘురామ రాజు లక్ష్మినారాయణ కాల్ డేటా రికార్డులను పొందినట్లు ప్రచారం జరుగుతోంది. ఆయన ద్వారానే ఆ వివరాలు ఓ టీవీ చానెల్‌కు, వైయస్సార్ కాంగ్రెసు పార్టీ నాయకులకు అందినట్లు చెబుతున్నారు.

English summary

Although the role of the Nanded superintendent of police in gathering the call data record (CDR) of Central Bureau of Investigation (CBI) joint director VV Lakshminarayana is becoming clear as new evidence comes to light, Andhra Pradesh police is busy denying any connection here.