తెరాసలోకి ఐఎఎస్ అధికారి రమణాచారి?

By Pratap

Published: Tuesday, January 3, 2012, 10:00 [IST]

ఐఎఎస్ అధికారి రమణాచారి ఇటీవల పదవీ విరమణ చేయడం అందరినీ ఆశ్చర్యపరిచింది. మరింత పదవీకాలం ఉండగానే ముందస్తుగా పదవీ విరమణ చేయడం వెనక రహస్యమేమిటో ఎవరికీ అర్థం కాలేదు. మరో రెండేళ్ల పదవీ కాలం ఉండగానే ఆయన తప్పుకున్నారు. దీని వెనక రమణాచారి రాజకీయ ఆరంగేట్రం ఆలోచన ఉన్నట్లు ప్రచారం జరుగుతోంది. తెలంగాణలోని కరీంనగర్ జిల్లాకు చెందిన ఐఎఎస్ అధికారి రమణాచారి పలు పదవులు నిర్వహించారు. మంచి అధికారిగా కూడా పేరు సంపాదించుకున్నారు. సాహిత్య, కళారంగాల పట్ల ఆసక్తి ఉంది. అయితే, ఆయన తెలంగాణ రాష్ట్ర సమితి (తెరాస)లో చేరనున్నట్లు వినికిడి.

ఇప్పటికే ఇద్దరు ఐఎఎస్ అధికారులు తెరాసలో ఉన్నారు. ఇప్పుడు మూడో ఐఎఎస్ అధికారి తెరాసలోకి అడుగు పెట్టబోతున్నారు. తనకు ఇస్తున్న పదవుల పట్ల కూడా రమణాచారి తీవ్ర అసంతృప్తితో ఉన్నట్లు చెబుతున్నారు. తనకు సరైన పదవిని అప్పగించడం లేదనే ఆగ్రహం లోపల ఉన్నప్పటికీ దాన్ని బయట పెట్టకుండా ముందుగానే పదవీ విరమణ చేయడానికి నిర్ణయించుకున్నట్లు చెబుతున్నారు.

Published On January 3, 2012