కెసిఆర్‌కు కౌంటర్, పరకాలలో సమైక్యాంధ్ర అభ్యర్థి

By Pratap

Published: Thursday, March 29, 2012, 9:30 [IST]

సమైక్యాంధ్రులు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు కౌంటర్ ఇస్తున్నారు. నెల్లూరు జిల్లా కోవూరులో తమ పార్టీ అభ్యర్థిని పోటీకి దించుతామని ప్రకటించి హల్‌చల్ చేసిన కెసిఆర్‌పై సమైక్యాంధ్రవాదులు అదే ఆయుధాన్ని ఉపయోగిస్తున్నారు. వరంగల్ జిల్లా పరకాల అసెంబ్లీ నియోజకవర్గంలో తమ అభ్యర్థిని పోటీకి దించుతామని సమైక్యాంధ్ర బలహీనవర్గాల జెఎసి కన్వీనర్ వైవి సురేష్ తెలిపారు.

హైదరాబాదులోని లింగంపల్లికి చెందిన సమైక్యాంధ్ర మహిళా జెఎసి రాష్ట్ర అధ్యక్షురాలు గాంధీరాజు నాగలక్ష్మిని పరకాల ఉప ఎన్నికల్లో పోటీకి దించుతున్నట్లు ఆయన బుధవారం వెల్లడించారు. ఈ నియోజకవర్గంలో వైయస్సార్ కాంగ్రెసు పార్టీ నాయకురాలు కొండా సురేఖ పోటీ చేయడం ఖాయమైన విషయం తెలిసిందే. నిజంగానే సమైక్యాంధ్ర జెఎసి అభ్యర్థి పోటీకి దిగుతారా, లేదా వేచి చూడాల్సిందే.

Published On March 29, 2012