జగన్‌కు ఝలక్: తెరాసలో జలగం వెంకట్రావు ?

By Pratap

Published: Friday, June 21, 2013, 10:55 [IST]

ఖమ్మం: మాజీ ముఖ్యమంత్రి జలగం వెంగళరావు తనయుడు జలగం వెంకటరావు వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు ఝలక్ ఇచ్చేట్లున్నారు. ఆయన వైయస్సార్ కాంగ్రెసు నుంచి తప్పుకుని తెలంగాణ రాష్ట్ర సమితి (తెరాస)లో చేరే అవకాశాలున్నట్లు ప్రచారం సాగుతోంది. ఆయన వైయస్సార్ కాంగ్రెసు పార్టీలో అసంతృప్తిగా ఉన్నట్లు తెలుస్తోంది. వైయస్ జగన్ షర్మిల ఖమ్మం పాదయాత్రలో ఆయన అసంతృప్తి బయటపడింది.

జలగం వెంకటరావు అనుచరులు షర్మిల సభకు వచ్చి ఆయనకు అనుకూలంగా నినాదాలు చేయడంతో షర్మిల తన ప్రసంగాన్ని మధ్యలోనే ఆపేసి వెళ్లిపోయారు. తనకు వైయస్సార్ కాంగ్రెసులో తగిన ప్రాధాన్యం లభించడం లేదని జలగం వెంకటరావు భావిస్తున్నట్లు సమాచారం.

కాగా, ఖమ్మం జిల్లాలో తెరాసకు అంతగా బలం లేదు. జలగం వెంకటరావు చేరితే తెరాస ఆ జిల్లాలో బలపడే అవకాశం ఉంది. తెలంగాణవాదం ఖమ్మం జిల్లాలో తక్కువగా ఉందని అంచనాలు సాగుతున్నాయి. ఆ ఉద్దేశంతోనే నిరాహారదీక్ష చేస్తున్న కెసిఆర్‌ను అరెస్టు చేసి అప్పట్లో ఖమ్మం ఆస్పత్రికి తరలించారు. కానీ, అందుకు విరుద్ధమైన ప్రతిస్పందన లభించింది.

జలగం వెంకటరావు గతంలో కాంగ్రెసులో ఉండేవారు. రేణుకా చౌదరి కాంగ్రెసు నేతగా ఖమ్మం జిల్లాలోకి ప్రవేశించిన తర్వాత జలగం కుటుంబానికి ప్రాధాన్యం తగ్గిందని అంటారు. ఏమైనా, జలగం వెంకటరావు తెరాసలో చేరితే సమీకరణాలు మారే అవకాశం ఉంది.

Published On June 21, 2013