మోడీ స్టైల్: నారా లోకేష్ బ్రింగ్ బాబు బ్యాక్
హైదరాబాద్: గుజరాత్ ముఖ్యమంత్రి నరేంద్ర మోడీ శైలిలో తెలుగుదేశం పార్టీ కోసం ఆ పార్టీ అధ్యక్షుడు నారా చంద్రబాబు నాయుడి తనయుడు నారా లోకేష్ పార్టీని అధికారంలోకి తేవడానికి వివిధ కార్యక్రమాలకు శ్రీకారం చుడుతున్నారు. తాజాగా ఆయన బ్రింగ్ బాబు బ్యాక్ పేరుతో ఆయన సరికొత్త ప్రచారానికి తెర తీశారు. శనివారం ఆయన ఈ కార్యక్రమానికి శ్రీకారం చుట్టారు.
బాబును తిరిగి అధికారంలోకి తెండి అనే నినాదంతో నారా లోకేష్ రాష్ట్రవ్యాప్తంగా కార్యక్రమాలు నిర్వహించనున్నట్లు అర్థమవుతోంది. యువతను అందుకు వాహకంగా వాడుకోవాలని ఆయన చూస్తున్నారు. అందుకు ఆయన యువసదస్సులు నిర్వహిస్తున్నారు. కొత్త ఓటర్లను ఆకట్టుకునేందుకు ఈ కార్యక్రమం పనికి వస్తుందని ఆయన భావిస్తున్నట్లు తెలుస్తోంది.
కాగా, నారా లోకేష్ చేపట్టిన ఆ కార్యక్రమాన్ని వైయస్సార్ కాంగ్రెసు పార్టీ శాసనసభ్యుడు భూమన్ కరుణాకర్ రెడ్డి అవహేళన చ ేశారు. చంద్రబాబుది రాక్షస పాలన అని, తొమ్మిదేళ్లు ముఖ్యమంత్రిగా పనిచేసిన చంద్రబాబు ఏం చేశారని ప్రజలు అధికారం కట్టబెడుతారని ఆయన అన్నారు.
గతంలో దెయ్యాలొస్తున్నాయనే భయంతో ప్రజలు ఓ స్త్రీ రేపు రా అని రాసుకునేవారని, ఇప్పుడు చంద్రబాబు నువ్వు ఇక రాకు అనే పరిస్థితులు ఉన్నాయని ఆయన ఎద్దేవా చేశారు. చంద్రబాబు పాలన రాకూడదని ప్రజలు పూజలు చేస్తున్నారని ఆయన అన్నారు.