మీడియాకు టోకరా ఇచ్చిన నిత్యానంద

బెంగళూర్: వివాదాస్పద స్వామి నిత్యానంద మీడియా నుంచి తప్పుకోవడంలో అత్యంత సామర్థ్యాన్ని ప్రదర్శించాడు. నిత్యానంద లైంగిక సామర్థ్య పరీక్షలకు వెళ్తాడని సమాచారం అందుకున్న మీడియా ప్రతినిధులు సోమవారం ఉదయం ఆరు గంటల నుంచి బిదాడిలోని ధ్యానపీఠం ఆశ్రమం రెండు ద్వారాల వద్ద కాపు కాస్తూ ఉండిపోయారు.

నిత్యానందను పోలిన ఓ వ్యక్తి కాషాయ వస్త్రాలు ధరించి ముఖాన్ని చాటు చేసుకుని ప్రధాన ద్వారం గుండా వాహనంలో బయటకు వచ్చాడు. దాంతో నిత్యానంద బయటకు వచ్చాడని భావించి మీడియా ప్రతినిధులు ఆ వాహనాన్ని కొంత దూరం అనుసరించారు. అయితే, ఆ వాహనం యూటర్న్ తీసుకుని మళ్లీ ఆశ్రమానికి చేరుకోవడంతో తమకు టోకరా ఇచ్చారని మీడియా ప్రతినిధులు గ్రహించారు.

అప్పటికి ఉదయం 7 గంటల 40 నిమిషాలు అయింది. అప్పటికే నిత్యానంద విక్టోరియా ఆస్పత్రికి చేరుకున్నట్లు మీడియా ప్రతినిధులకు సమాచారం అందింది. నిత్యానందకు లైంగిక సామర్థ్య పరీక్షలు ఉదయం ఎనిమిదిన్నర గంటలకు ప్రారంభమై మధ్యాహ్నం ఒంటి గంటన్నరకు సాగాయి.

అయితే, నిత్యానంద మీడియాకు ఎదురు కావడానికి ఇష్టం లేక బయటకు కూడా రాలేదు. కొన్ని గంటల పాటు విశ్రాంతి తీసుకోవడానికి నిత్యానంద వైద్యులను అడిగాడు. నిత్యానంద శిష్యులు ఫలాలు, ఇతర తినుబండారాలను లోనికి తీసుకుని వెళ్లారు. చివరకు తనదైన నవ్వు మాయమైన స్థితిలో నిత్యానంద సాయంత్రం 5 గంటలకు బయటకు వచ్చాడు.

English summary

Controversial self-styled godman Nithyananda sent his body double ahead of his potency test on Monday, hoodwinking the media people, who had camped since 6 am near the two gates of Dhyanapeetam Ashram in Bidadi.