వీటి సూప్.. సూపర్: అలోవిరాను మించిన ప్రయోజనాలు
వేడివేడి సూప్ మంచి రుచిని అందించడమే కాకుండా, శరీరానికి వెచ్చదనాన్ని, ఆరోగ్యాన్ని చేకూరుస్తాయి. ఇంటి వద్దే సూప్ తయారుచేసుకున్నప్పుడు, అందులో వాడే కూరగాయలు, మాంసం వంటి వాటి పోషక విలువలు పూర్తిగా ఉండేలా చూసుకోవాలి. ఆరోగ్యకరమైన జీవనశైలిలో మునక్కాయ ఓ భాగం. వీటిని కూర, సాంబార్ లల్లో వేసుకోవడంతో పాటు సూప్ గా కూడా తీసుకోవచ్చు. రుచితో పాటు ఆరోగ్యానికి ఎంత మేలు కలగిస్తుందీ సూప్.
మునగకాయ సూప్ తీసుకోవడం వల్ల అనేక ఆరోగ్య ప్రయోజనాలు కలుగుతాయి. ఇందులో అధికంగా ఉండే విటమిన్ సీ, విటమిన్ ఏ రోగనిరోధక కణాలను క్రియాశీలం చేసి, శరీరం సహజ రక్షణ వ్యవస్థను బలోపేతం చేస్తాయి. దీంతో వ్యాధుల బారి నుండి రక్షణ లభిస్తుంది. మునగకాయలోని డైటరీ ఫైబర్ జీర్ణక్రియను మెరుగుపరుస్తుంది. కడుపు ఉబ్బరాన్ని తగ్గిస్తుంది. అలాగే ప్రేగుల ఆరోగ్యాన్ని కాపాడుతుంది. అదేవిధంగా మునగాకుల్లోని ఐరన్, మెగ్నీషియం అలసటను తగ్గించి, రోజంతా చురుకుగా ఉంచే శక్తిని అందిస్తాయి.
ఇవి కాకుండా, మునగలోని యాంటీఆక్సిడెంట్లు చర్మాన్ని ఒత్తిడి, వృద్ధాప్య ఛాయల నుండి రక్షిస్తూ, స్పష్టమైన, కాంతివంతమైన చర్మాన్ని అందిస్తాయి. మునగలో రక్తంలో చక్కెర స్థాయిలను సమతుల్యం చేసే సమ్మేళనాలు ఉండటం ద్వారా శరీర శక్తికి, మంచి మానసిక స్థితికి దోహదపడుతుంది. కాల్షియం, ఫాస్పరస్లు అధికంగా ఉండటం వల్ల మునగ ఎముకలను బలోపేతం చేస్తుంది. ఇది ఎముకల ఆరోగ్యాన్ని కాపాడటమే కాకుండా, వాటి దృఢత్వానికి మద్దతునిస్తుంది.
మునక్కాయ సూప్ తయారీకి కావాల్సిన పదార్థాలు:
2 మునగకాయలు, 1 గుప్పెడు మునగ పూలు, 1 గుప్పెడు మునగాకులు, 1 చిన్న టమాటో, 1 టీస్పూన్ వెన్న, అర టీస్పూన్ జీలకర్ర, అర టీస్పూన్ పసుపు, 1 కప్పు ఉడికించిన పెసరపప్పు, రుచికి సరిపడా ఉప్పు, రుచికి సరిపడా మిరియాల పొడి.
తయారీ విధానం:
ముందుగా, పెసరపప్పును శుభ్రంగా కడిగి, తగినంత ఉప్పు, మిరియాల పొడి, పసుపు కలిపి ప్రెషర్ కుక్కర్లో మూడు విజిల్స్ వచ్చే వరకు ఉడికించాలి.
తరువాత, మునగకాయలను శుభ్రం చేసి, వేలి పొడవు ముక్కలుగా తరగాలి. వీటిని రెండు కప్పుల నీటితో ఒక పాన్లో వేసి మెత్తగా ఉడికించాలి. ఉడికిన మునగకాయ గుజ్జును స్పూన్తో తీసి పక్కన పెట్టుకోవాలి. ఈ గుజ్జును మిక్సీలో వేసి మెత్తగా చేసుకోవాలి.
చివరగా, ఒక పాన్లో వెన్న వేసి వేడి అయ్యాక జీలకర్ర వేసి చిటపటలాడనివ్వాలి. ఆపై మునగ పూలు, మునగాకులు, తరిగిన టమాటో ముక్కలను వేసి మెత్తబడే వరకు వేయించాలి. ఇప్పుడు ఉడికించిన పప్పు నీటిని కలిపి మరిగించాలి.
ఈ మిశ్రమం ఒకే రకంగా అయ్యే వరకు కలుపుతూ ఉడికించాలి. ఇప్పుడు మునగకాయ గుజ్జును కలిపి బాగా మిక్స్ చేయాలి. రుచికి తగ్గట్టుగా ఉప్పు, మిరియాల పొడి వేసి బాగా మరిగించిన తర్వాత వేడివేడిగా సర్వ్ చేయాలి.
Click it and Unblock the Notifications
Sign in with Google