Vastu tips: గులాబీలతో గౌరవం, ప్రేమ; ఆర్ధిక సమస్యలకు చెక్.. ఎలాగంటే!!

ఇంటిని ఏ విధంగా అయితే వాస్తు ప్రకారం నిర్మించుకుంటామో, అలాగే ఇంట్లో పెట్టుకునే వస్తువులు విషయంలో కూడా వాస్తు నియమాలు పాటించాలి. అంతేకాదు కొన్ని సందర్భాలలో మొక్కలు, పువ్వులు కూడా ఇంటి వాస్తు నిర్ణయిస్తాయి. ఇంట్లో ఉన్న వాస్తు దోషాలను తొలగించి కుటుంబానికి సంతోషాన్ని అందిస్తాయి. కుటుంబ జీవితంలో ప్రేమ వెల్లివిరిసేలా చేస్తాయి.

అలా వాస్తుప్రకారం ఇంటికి మంచి చేసే పువ్వులలో గులాబీ పువ్వులు ఎంతో ముఖ్యమైనవి. ఇంట్లో గులాబీ మొక్క ఉంటే వాస్తుకు సంబంధించిన ఎటువంటి దోషాలు తొలగించడానికి అయినా అది ఎంతగానో పనిచేస్తుంది. ఇంట్లో సానుకూల శక్తిని తీసుకురావడానికి గులాబీ మొక్క ఉపయోగపడుతుంది. గులాబి ప్రేమకు చిహ్నంగా భావిస్తారు. ఈ క్రమంలో గులాబీ భార్యభర్తల మధ్య ప్రేమ రాహిత్యాన్ని తగ్గించి వారి మధ్య ప్రేమానుబంధం మరింత పెంచుతుంది.

వాస్తు శాస్త్రం ప్రకారం గులాబీకి సంబంధించిన కొన్ని చిట్కాలు జీవితంలో అనేక సమస్యల నుంచి బయట పడేలా చేస్తాయి. కుటుంబంలోని వ్యక్తులు ఏదైనా సమస్యను ఎదుర్కొంటుంటే ప్రతి శుక్రవారం లక్ష్మీదేవికి ఎర్ర గులాబీ పువ్వులు సమర్పిస్తే ఫలితం ఉంటుంది. లక్ష్మీ దేవి ఆశీస్సులు సదరు కుటుంబసభ్యులపై ఉంటాయి. ఇంట్లో పాజిటివ్ ఎనర్జీ పెరుగుతుంది.

ఇక పెళ్లయిన వారికి వారి దాంపత్య జీవితంలో ఏదైనా ఇబ్బంది ఎదురైతే పడక గదిలో ఒక గ్లాసులో కానీ ఒక గాజు పాత్రలో కానీ నీటిని పోసి కొన్ని గులాబీ రేకులతో ఆ పాత్రను నింపాలి. గులాబీ రేకులు ఎప్పుడూ ఫ్రెష్ గా ఉండేలా చూసుకుంటూ ఎప్పటికప్పుడు మార్చుకోవాలి. ఇలా చేస్తే ఇబ్బందులు తొలగిపోతాయి. భార్య భర్తల మధ్య ప్రేమ రాహిత్యం తగ్గి, ప్రేమ బంధం బలపడుతుంది.

ఇక వాస్తు శాస్త్రం ప్రకారం గులాబీ మొక్కలు నైరుతి దిశలో పెట్టాలి. నైరుతిదిశలో గులాబీ మొక్కలు పెట్టడం వల్ల ఆ వ్యక్తికి సమాజంలో గౌరవం బాగా పెరుగుతుంది. వారు సమాజంలో ఉన్నత స్థానానికి చేరుకోవడానికి అవకాశం ఉంటుంది. అంతే కాదు చాలా మంది జీవితంలో ఏదో ఒక సమయంలో ఆర్థిక సంక్షోభాన్ని ఎదుర్కొంటున్నారు. వారికి గులాబీ ఎంతో మేలు చేస్తుంది.

జీవితంలో ఆర్థిక ఇబ్బందులను ఎదుర్కొనే వారు శుక్రవారం రోజు దుర్గాదేవికి ఐదు గులాబీ రేకులను తమలపాకులో పెట్టి సమర్పించాలి. ప్రతిరోజు సాయం సంధ్య వేళలో లక్ష్మీదేవిని గులాబీ పూలతో పూజించాలి. ఇలా చేస్తే లక్ష్మీదేవికి సంతోషం కలుగుతుంది. లక్ష్మీదేవి మీ జీవితంలో ఉండే అన్ని డబ్బు సమస్యలను తొలగించి ఆర్థికంగా మరింత బలోపేతం చేస్తుంది.

disclaimer: ఈ కథనం వాస్తు, జ్యోతిష్య నిపుణుల సలహాలు, ఇంటర్నెట్ లో అందుబాటులో ఉన్న సమాచారం ఆధారంగా రూపొందించబడినది. దీనిని oneindia ధ్రువీకరించలేదు.

English summary

Rose flower is considered as a symbol of love. In this order, the rose reduces the intimacy between the married couple and increases the love relationship between them. Removes financial difficulties.