తీవ్రవాదం వేరు..జీహాద్‌ వేరుః పాక్‌

ఖాట్మండూః సార్క్‌ వేదికపై కూడా పాకిస్తాన్‌ తన బుద్ధి పోనిచ్చుకోలేదు. తీవ్రవాదనికి... స్వతంత్ర పోరాటానికి తేడా గ్రహించాలని సార్క్‌ సదస్సులో ప్రసంగించిన పాక్‌ సైన్యాధ్యక్షుడు జనరల్‌ పర్వేజ్‌ ముషారఫ్‌ అన్నారు. గట్టిగా గిల్లి జోలపాడిన చందంగా కాశ్మీర్‌ లో తీవ్రవాదాన్ని ప్రోత్సహించడాన్ని సమర్ధించుకుంటూనే భారత్‌ శాంతి మార్గాన నడవాలని ముషారఫ్‌ ధర్మ పన్నాలు పలికారు. ఆసియా ఉపఖండంలో శాంతి విలసిల్లాలంటే భారత్‌ - పాకిస్తాన్‌ ల మధ్య చర్చలు జరగాలని ముషారఫ్‌ సార్క్‌ వేదిక నుంచి పిలుపునిచ్చారు.

భారత్‌ ప్రధాని వాజ్‌ పేయి శాంతియుతంగా, చర్చల ద్వారా సమస్యల పరిష్కారానికి ముందుకువస్తారని ముషారఫ్‌ ఆశాభావం వ్యక్తం చేశారు. తీవ్రవాద నిర్మూలనకు పలు చర్యలు తీసుకున్నామని ముషారఫ్‌ చెప్పుకున్నారు. తీవ్రవాదం వేరు..... స్వతంత్ర పోరాటం వేరని కాశ్మీర్‌ లో జరుగుతున్నది స్వతంత్రం కోసం పోరాటమని ముషారప్‌ పరోక్షంగా చెప్పారు. శాంతి స్థాపనకు పాకిస్తాన్‌ సిద్ధంగా వున్నదని భారత్‌ ప్రధాని వాజ్‌ పేయి ముందుకు రావాలని ముషారఫ్‌ అన్నారు. ముషారఫ్‌ ప్రసంగం అంతా దాదాపు తీవ్రవాదంపైనే కొనసాగింది. ప్రసంగం ముగించిన అనంతరం ముషారఫ్‌ తన స్థానానికి వెళ్ళి కూర్చోవడానికి ముందు వేదికపై వున్న నేతలతో వరసగా కరచాలనం చేస్తూ వాజ్‌ పేయితో కూడా కరచాలనం చేశారు.