రాజమండ్రిలో దేశం-బిజెపి ఖటీఫ్‌

రాజమండ్రిః రాజమండ్రి కార్పొరేషన్‌ ఎన్నికల్లో అధికార తెలుగుదేశం పార్టీ, దాని మిత్రపక్షమైన భారతీయ జనతాపార్టీలు ఉమ్మడిపోరుకు ఒక ఆంగీకారానికి రాలేకపోయాయి. దీంతో ఉభయ పార్టీలు ఒంటరి పోరాటానికి సిద్ధం అయ్యాయి. ప్రతిష్ఠాత్మకమైన రాజమండ్రి కార్పొరేషన్‌ కు జరుగుతున్న ఎన్నికల్లో 44 స్థానాలకు గాను పది స్థానాలను బిజెపికి కేటాయించేందుకు తెలుగుదేశం పార్టీ అంగీకరించింది. అయితే రెండు మినహా మిగిలిన స్థానాలు బిజెపికి ఏ మాత్రం పట్టు లేని స్థానాలను కేటాయించడంతో బిజెపి వర్గాలు తెలుగుదేశంపై మండిపడ్డాయి.

మంగళవారం రాత్రి మంత్రి పుష్పరాజ్‌ - బిజెపి రాష్ట్ర ఉపాధ్యక్షుడు సీట్ల పంపకంపై జరిపిన చర్చలు విఫలం అయ్యాయి. తెలుగుదేశం పార్టీ ఒంటెద్దు పోకడలు పోతున్నదంటూ చలపతిరావు విమర్శించారు. తమకు ఏ మాత్రం పట్టు లేని ఎనిమిది స్ధానాలను ఇచ్చి వాటితో సర్దుకోమనడంలో అర్థం లేదని ఆయన ఆవేదన వ్యక్తం చేశారు. పొత్తుకు స్వస్తి చెప్పి విడివిడిగా పోటీచేసేందుకు రెండు పార్టీలు సిద్ధమయ్యాయి. 44 కార్పొరేటర్‌ స్థానాల్లో తెలుగుదేశం అన్ని స్థానాల్లో తమ అభ్యర్థులను బరిలోకి దించగా బిజెపి 42 స్థానాల్లో పోటీకి దిగింది. మిగిలిన రెండు స్థానాల్లో కూడా స్వతంత్ర అభ్యర్థులకు మద్దతు ఇవ్వాలని నిర్ణయించింది. హైదాబాద్‌ లో వంద కార్పొరేషన్‌ స్థానాలకు గాను 45 స్థానాలను బిజెపికి కేటాయించేందుకు సిద్ధపడ్డ తెలుగుదేశం పార్టీ రాజమండ్రిలో ఈ వైఖరిని అవలంబించడం గమనార్హం.