పాక్‌పై అద్వానీ ధ్వజం

వాషింగ్టన్‌: పాకిస్థాన్‌పై భారత హోం మంత్రి ఎల్‌.కె. అద్వానీ తీవ్రంగా ధ్వజమెత్తారు. పాకిస్థాన్‌కు వ్యతిరేకంగా దౌత్య ప్రచారం చేపట్టే కార్యక్రమంలో అద్వానీ తన మొదటి రోజు అమెరికా పర్యటనలో అమెరికా ఉన్నతాధికారులతో సమావేశమయ్యారు.

పాకిస్థాన్‌ ప్రేరేపిత ఉగ్రవాదాన్ని అంతం చేసి తీరుతామని ఆయన చెప్పారు. మిలిటెంట్ల చర్యలకు సంబంధించి తాము చేసిన డిమాండ్లపై పాకిస్థాన్‌ వెంటనే చర్యలు తీసుకోవాలని ఆయన అన్నారు. పాకిస్థాన్‌ చర్య తీసుకోవాలని, ఆ చర్య నిర్ణయాత్మకంగా, నిజాయితీగా, వేగంగా వుండి తీరాలని ఆయన విలేకరులకు పంపిణీ చేసిన ప్రకటనలో అన్నారు. కాశ్మీర్‌లోకి మిలిటెంట్ల చొరబాట్లను ప్రోత్సహించడం విరమించుకోవాలని ఆయన పాకిస్థాన్‌ను డిమాండ్‌ చేశారు.

మిలిటెంట్లపై మరింతగా ఉక్కుపాదం మోపాలని అద్వానీని కలిసిన అమెరికా విదేశాంగ మంత్రి కాలిన్‌ పావెల్‌ పాకిస్థాన్‌కు సూచించారు.