ఇస్లామాబాద్‌: ఇస్లామిక్‌ మిలిటెంట్‌ గ్రూప్‌లపై చర్యలు తీసుకోవడంలో భాగంగా పాకిస్థాన్‌ పోలీసులు జైష్‌- ఎ- మహ్మద్‌ సీనియర్‌ నాయకుడు హసన్‌ బర్కీని అరెస్టు చేశారు. పంజాబ్‌ ప్రొవిన్స్‌లోని బహవల్పూర్‌ నుంచి వచ్చిన వెంటనే బర్కీని బుధవారం రాత్రి పాకిస్థాన్‌ పోలీసులు అదుపులోకి తీసుకున్నారు.

బర్కీ అరెస్టుతో ఉగ్రవాద సంస్థల ప్రధాన నాయకులందరినీ ప్రభుత్వం అదుపులోకి తీసుకున్నట్లయిందని నేషన్‌ దిన పత్రిక గురువారంనాడు వ్యాఖ్యానించింది. భారతదేశంలో దాడుల గురించి బర్కీ గత కొద్ది రోజులుగా మీడీయా ప్రతినిధులతో మాట్లాడుతూ వస్తున్నారు.

పాకిస్థాన్‌ పోలీసులు జైష్‌- ఎ- మహ్మద్‌ వ్యవస్థాపక నేత మౌలానా మసూద్‌ అజర్‌ను, ఆయన నలుగురు సోదరులను అరెస్టు చేశారు. రెచ్చగొట్టే ప్రకటనలు చేసిందనందుకు వారిని అరెస్టు చేశారు. లష్కర్‌-ఎ- తోయిబా వ్యవస్థాపక నేత హఫీజ్‌ ముహమ్మద్‌ సయీద్‌ను కూడా పాకిస్థాన్‌ అరెస్టు చేసింది. తాను లష్కర్‌- ఎ- తోయిబా నాయకత్వం నుంచి తప్పుకుంటున్నట్లు ఆయన అరెస్టయిన తర్వాత ప్రకటించారు.