అభివృద్ధే ప్రచారఅస్త్రం

హైదరాబాద్‌ః తమ ప్రభుత్వాలు చేపట్టిన అభివృద్ధి పనలనే బల్దియా ఎన్నికల్లో ప్రధాన ప్రచార అస్త్రంగా ఉపయోగించాలని తెలుగుదేశం, బిజెపి పార్టీలు నిర్ణయించాయి. ఎన్నికల్లో కలిసి పోటీ చేస్తున్న ఈ రెండు పార్టీలు కలసికట్టుగా ప్రచారాన్ని ముమ్మరంగా జరపాలని నిర్ణయించాయి. ఈ రెండు పార్టీల ఉమ్మడి సమావేశం శనివారం నాడు ఎన్‌టిఆర్‌ భవన్‌లో జరిగింది.

ఈ సమావేశంలో పాల్గొన్న ముఖ్యమంత్రి అభివృద్ధి పనులు కేవలం తెలుగుదేశం హయాంలోనే జరుగుతున్నాయని చెప్పారు. అనేక ఏళ్లపాటు రాష్ట్రాన్ని పాలించిన కాంగ్రెస్‌ పార్టీ చెప్పుకోవడానికి అభివృద్ధి ఏమున్నదని ఆయన ప్రశ్నించారు. తెలుగుదేశం పార్టీ చేస్తున్న అభివృద్ధికి అడ్డం పడటం తప్ప కాంగ్రెస్‌ చేస్తున్నదేమీ లేదని ఆయన అన్నారు. అనేక ఏళ్లుగా పాతబస్తీకి ప్రాతినిధ్యం వహిస్తున్న మజ్లిస్‌ ఎమ్మెల్యేలు, ఎంపీలు పాతబస్తీ అభివృద్ధికి ఏం కృషి చేశారని ఆయన ప్రశ్నించారు. మజ్లిస్‌ మతరాజకీయాలను ఎండగట్టి కేంద్రంలో బిజెపి, రాష్ట్రంలో తెలుగుదేశం చేపట్టిన అభివృద్ధి కార్యక్రమాలను గురించి విశేషంగా ప్రచారం చేయాలని బిజెపి నేత చింతల రామచంద్రారెడ్డి పిలుపునిచ్చారు.