ద్వైపాక్షిక అంశాలపైనే చైనా నేత చర్చ

న్యూఢిల్లీః ప్రదాని వాజ్‌పేయి ఇతర నేతలతో తాను ప్రధానంగా ద్వైపాక్షిక అంశాలపైనే చర్చలు జరుపనున్నట్టుగా భారత పర్యటనలో వున్న చైనా ప్రధాని ఝూ రోంగ్జి చెప్పారు. ఆదివారం నాడు ఆగ్రానుంచి ఢిల్లీ వచ్చిన రోంగ్జి సోమవారం నాడు రాష్ట్రపతి కె ఆర్‌ నారాయణ్‌ను కలుసుకున్నారు. ప్రధాని కార్యాలయం వద్ద ప్రధాని వాజ్‌పేయి ఆయనకు ఘనంగా స్వాగతం చెప్పారు. స్వాగత సత్కారాల తర్వాత ఆయన గౌరవ సైనికవందన స్వీకరించారు.

భారత నేతలతో చర్చల్లో ద్వైపాక్షిక అంశాలు, ఉభయదేశాలకు సంబంధం వున్న అంతర్జాతీయ అంశాలు ప్రధానంగా చర్చకు వస్తాయని రాష్ట్రపతి భవన్‌లో విలేకరులతో మాట్లాడుతూ ఆయన వివరించారు. భారత్‌లో చైనా ప్రధాని పర్యటన ఆరురోజుల పాటు వుంటుంది. ప్రధానితోపాటు విదేశాంగ మంత్రి జస్వంత్‌ సింగ్‌, రక్షణ మంత్రి జార్జ్‌ ఫెర్నాండెజ్‌తో కూడా ఆయన మంతనాలు జరుపుతారు. ప్రధానితో చర్చల తర్వాత సైన్స్‌, టెక్నాలజీ, బిజినెస్‌తో సహా వివిధ రంగాలకు సంబంధించి అరడజను ఒప్పందాలపై ఉభయదేశాలు సంతకాలు చేసే అవకాశం వుంది. పంచసూత్ర ప్రాతిపదికన భారత్‌తో మైత్రి సంబంధాల అభివృద్ధికి తాము కట్టుబడి వున్నామని ఝూ చెప్పారు.