మహోన్నత దేశం మన భారతం

న్యూఢిల్లీః ఎన్ని సంక్షోభాలు ఎదురైనప్పటికీ భారతదేశం మహోన్నత శక్తిగా ఎదుగుతుందని, ప్రపంచశాంతి కోసం కృషి చేస్తుందని ప్రధాని అటల్‌ బిహారీ వాజ్‌ పేయి ధీమా వ్యక్తం చేశారు. మకరసంక్రాంతి సందర్భంగా మంగళవారం రాత్రి తనను కలిసిన దక్షిణాదికి చెందిన ప్రజలను ఉద్దేశించి ఆయన ప్రసంగించారు. భారత దేశం ఓ మహోన్నత శక్తిగా ఎదిగేందుకు, ప్రపంచశాంతి సాధన దిశగా కృషి చేసేందుకు ప్రయత్నిస్తుందని ఆయన హామీ ఇచ్చారు.

దేశం సంక్షోభం ముంగిట వున్నప్పటికీ ఈ ఏడాది పంటలు బాగా పండడం, ప్రజల్లో సౌభ్రాతృత్వం విలసిల్లుతున్న ఫలితంగా అందరూ మనోధైర్యంతో వున్నారని ఆయన అన్నారు. భారత సైనికులు దేశ రక్షణ కోసం రేయంబవళ్లు కృషి చేస్తున్నారని ఆయన చెప్పారు. మకరసంక్రాంతి మార్పుకు చిహ్నమని భారత దేశంలోనే కాకుండా ప్రపంచదేశాల్లో కూడా ఈ పండుగ జరుపుకుంటున్నారని వాజ్‌ పేయి అన్నారు. ఈ కార్యక్రమంలో కేంద్ర మంత్రులు అనంతకుమార్‌, వెంకయ్యనాయుడు తదితరులు పాల్గొన్నారు.