పాక్‌ ఆక్రమిత కాశ్మీరూ మాదే: జస్వంత్‌

న్యూఢిల్లీ: పాకిస్థాన్‌ ఆక్రమిత కాశ్మీర్‌ తమదేనని భారత విదేశాంగ మంత్రి జస్వంత్‌ సింగ్‌ అన్నారు. జమ్మూ కాశ్మీర్‌లోని నియంత్రణ రేఖను అంతర్జాతీయ సరిహద్దు రేఖగా గుర్తించాలనే సూచనలను ఆయన సోమవారం తిరస్కరించారు. పాకిస్థాన్‌ ఆక్రమిత కాశ్మీర్‌తో సహా జమ్మూ కాశ్మీర్‌ రాష్ట్రమంతా భారత్‌లో అంతర్భాగమేనని 1994లో పార్లమెంటు చేసిన తీర్మానానికి కట్టుబడి వుంటామని ఆయన స్పష్టం చేశారు.

నియంత్రణ రేఖను(ఎల్‌ఒసిని) అంతర్జాతీయ సరిహద్దు రేఖగా గుర్తించాలని జమ్మూ కాశ్మీర్‌ ముఖ్యమంత్రి ఫరూఖ్‌ అబ్దుల్లా చేసిన సూచన గురించివిలేకరులు ప్రస్తావించగా పార్లమెంటు తీర్మానానికి మేం కట్టుబడి వుంటాం. పాకిస్థాన్‌ ఆక్రమిత కాశ్మీర్‌ భారత్‌లోని అంతర్భాగం అని ఆయన అన్నారు. కాశ్మీర్‌ సమస్యనే ప్రధానమని భారత్‌లోని పాకిస్థాన్‌ రాయబారి అష్రాఫ్‌ జహంగీర్‌ ఖాజీ చేసిన ప్రకటన గురించి ప్రశ్నించగా- భారత్‌, పాక్‌ల మధ్య కాశ్మీర్‌ కీలకఅంశం కాదు. భారత జాతీయతలో కీలకం అని ఆయన ఇండియా టుడే కాంక్లేవ్‌ సందర్భంగా అన్నారు.

కాశ్మీర్‌ సమస్యలో పాకిస్థాన్‌ పాత్ర పోషించాల్సిన విషయం గురించి ప్రస్తావించగాఇరవై యేళ్ల క్రితం జనరల్‌ జియా వుల్‌ హక్‌ ప్రారంభించిన సీమాంతర ఉగ్రవాదానికి పాకిస్థాన్‌స్వస్తి చెప్పాలని, ఉగ్రవాదాన్ని ప్రభుత్వ విధానంగా వాడుకోవడం మానాలని ఆయన అన్నారు.

దేశం మరోసారి విభజనకు గురికాదని ఆయన అన్నారు. 1972 సివ్లూ ఒప్పందాన్ని గుర్తు చేస్తూ హింసాయుత పద్ధతుల ద్వారా నియంత్రణ రేఖను మార్చడం కుదరదని జస్వంత్‌ సింగ్‌ అన్నారు.