తిరుపతిలో కాంగ్రెస్‌ ధర్నా

తిరుపతిః తిరుపతి మున్సిపాలిటీకి జరిగిన ఎన్నికల కౌంటింగ్‌ గురువారం ఉదయం ప్రారంభమైంది. అయితే కౌంటింగ్‌ ప్రారంభంలో ఇద్దరు పోలింగ్‌ ఏజెంట్లను లోపలికి రానీయకపోవడంతో కాంగ్రెస్‌ వారు గొడవకు దిగారు. ఆ ఇద్దరు కాంగ్రెస్‌ ఏజెంట్లపై పోలీసు కేసులు వున్నందున వారిని కౌంటింగ్‌ కేంద్రంలోకి రానీయలేదంటూ అధికారులు సర్ది చెప్పే ప్రయత్నంచేశారు.

పోలింగ్‌ కేంద్రాల్లోకి తమ అభ్యర్థులను రానీయక పోవడంతో కాంగ్రెస్‌ అభ్యర్థి కరుణాకర్‌ రెడ్డి సారధ్యంలో కాంగ్రెస్‌ వారు ప్రదర్శనగా కౌంటింగ్‌ కేంద్రానికి వచ్చారు. అధికారులతో వాదనకు దిగారు. తెలుగుదేశం పార్టీకి అధికారులు తొత్తుల్లా వ్యవహరిస్తున్నారని ఆరోపించారు. వారిపై కేసులు వున్నందువల్లే కౌంటింగ్‌ కేంద్రంలోకి అనుమతించలేదని అధికారులు నచ్చచెప్పడంతో కౌంటింగ్‌ కార్యక్రమం సజావుగా సాగిపోతున్నది. గురువారం సాయంత్రానికి ఫలితాలు వెల్లడి కావచ్చునని భావిస్తున్నారు.