నిమ్స్‌ రెసిడెంట్‌ డాక్టర్లపై ఎస్మా?

హైదరాబాద్‌ః గత పదమూడు రోజులుగా ఫీజుల తగ్గింపును డిమాండ్‌ చేస్తూ సమ్మెకు దిగిన నిజామ్స్‌ ఇనిస్టిట్యూట్‌ ఆఫ్‌ మెడికల్‌ సైన్సెస్‌ (నిమ్స్‌) రెసిడెంట్‌ డాక్టర్లకు వ్యతిరేకంగా కఠిన చర్యలు తీసుకోవాలని ప్రభుత్వం నిర్ణయించింది. ఇందులో భాగంగా సోమవారం నాడు సంస్థ ప్రాంగణంలో సమ్మె చేస్తున్న డాక్టర్ల శిబిరాన్ని పోలీసులు బలవంతంగా తొలిగించారు. విద్యార్ధులను అరెస్టు చేసి సొంతపూచీకత్తుపై విడుదల చేశారు.

అవసరమైతేవీరిపై ఎస్మాను ప్రయోగించాలని కూడా ప్రభుత్వం యోచిస్తున్నట్టుగా తెలిసింది.విద్యార్ధులపై ఎస్మా ప్రయోగం చెల్లుతుందా లేదా అనే న్యాయపరమైనమీమాంసను పక్కనబెట్టి ముందుగా ఎస్మా కింద కేసులుపెట్టి అవసరమైతే న్యాయస్థానంలో తేల్చుకోవాలని ప్రభుత్వం యోచిస్తున్నది. సమ్మె చేస్తున్న వారిలో పిజి పూర్తయి క్లినికల్‌ రిజిస్ట్రార్స్‌గా పనిచేస్తున్నవారు, నెలరోజుల క్రితమే పిజీలో చేరినవిద్యార్ధులు వున్నారు. నిజానికి క్లినికల్‌ రిజిస్ట్రార్స్‌కు ఈ సమ్మెతో ఎలాంటి సంబంధం లేదని నిమ్స్‌ వర్గాలు చెబుతున్నాయి. ఫస్టియర్‌విద్యార్ధుల అడ్మిషన్లను రద్దు చేస్తున్నట్టుగా ఇప్పటికే ప్రకటించారు. మరోవైపు నిమ్స్‌ రెసిండెంట్స్‌ సమ్మెకు మద్దతుగా రాష్ట్ర జూనియర్‌ డాక్టర్ల సంఘం ఒక రోజు మెరుపు సమ్మెను ప్రకటించింది.