బాలయోగి భార్యకు రాజ్యసభసీటు

న్యూఢిల్లీః స్పీకర్‌ బాలయోగి అర్ధాంగి విజయకుమారిని తెలుగుదేశం తరఫున రాజ్యసభకు పంపే అవకాశం వున్నది. రాష్ట్రంలో వున్న సంప్రదాయం ప్రకారం ప్రజాప్రతినిధులుగా వున్న నేతలు దివంగతులైతే వారి వారసులకే అక్కడ పోటీ చేసేందుకు టికెట్‌ ఇస్తారు. అయితే ఇప్పుడున్న పరిస్థితిలో విజయకుమారి బాలయోగిని లోక్‌సభ ఉపఎన్నికల్లో పోటీ చేయించడం కన్నా రాజ్యసభకు పంపడం మంచిదని ముఖ్యమంత్రి చంద్రబాబు భావిస్తున్నట్టుగా చెబుతున్నారు.

లోక్‌సభ కాలపరిమితి మరో రెండేళ్లు మాత్రమే వుండటం, ఈ మధ్య కాలంలో కూడా ఎప్పుడేమవుతుందో తెలియని పరిస్థితి వుండటం వల్ల ఆయన ఈ నిర్ణయం తీసుకున్నట్టుగా తెలిసింది. రాజ్యసభకయితే ఆరేళ్ల వరకు ఢోకా వుండదు. ఈ లోపు చిన్న వయస్సులో వున్న బాలయోగి పిల్లలుసెటిల్‌ అయ్యే అవకాశం కూడా వుంది. చంద్రబాబుకు బాలయోగి అత్యంత సన్నిహితుడన్నవిషయం తెలిసిందే. ఇప్పుడు ఎలాగు నాలుగు రాజ్యసభ స్థానాలకు తెలుగుదేశం పార్టీ అభ్యర్ధులను ఎంపిక చేయాల్సివుంది.అందులో ఒక సీటు విజయకుమారికి కేటాయిస్తారు. ఆ తర్వాత అమలాపురం లోక్‌సభ నియోజకవర్గానికిజరిగే ఉపఎన్నికల్లో ఎవరు పోటీ చేసినా బాలయోగిపేరుతో అలవోకగా విజయం సాధించడానికి అవకాశం వుంటుంది.